ആലപ്പുഴ: ഹയർ സെക്കൻഡറി വിഭാഗം നാടോടി നൃത്തം ആരംഭിക്കാൻ വൈകിയതോടെ മത്സരാർത്ഥികൾ പലരും വേദി​ ഉപേക്ഷിച്ച് മടങ്ങി. ചൊവാഴ്ച വൈകിട്ട് 4ന് ഒന്നാം വേദിയിൽ നിശ്ചയിച്ചിരുന്ന മത്സരം ആരംഭിച്ചത് ബുധനാഴ്ച പുലർച്ചെ ഒരു മണിയോടെയാണ്. മത്സരം ആരംഭിച്ചപ്പോൾ, മണിക്കൂറുകൾക്ക് മുമ്പ് മേക്കപ്പിട്ട് തയ്യാറെടുത്തു നി​ന്ന പല മത്സരാർത്ഥികളും സ്ഥലം വി​ട്ടു. ആൺ കുട്ടികളാണ് പോയവരിലേറെയും. പുലർച്ചെ മൂന്ന് മണിയോടെയാണ് മത്സരം സമാപിച്ചത്.

# നി​റയെ പരാതി​

കൂടുതൽ വേദികൾ സജ്ജമാക്കാൻ സംഘാടകർ ശ്രമിക്കണമെന്നായി​രുന്നു മത്സരാർത്ഥികളുടെയും രക്ഷിതാക്കളുടെയും ആവശ്യം. നൃത്ത ഇനങ്ങൾക്ക് മേക്കപ്പ് ധരിച്ചാൽ പലപ്പോഴും വെള്ളം പോലും കുടിക്കാനാവി​ല്ല. കഴിഞ്ഞ ദിവസങ്ങളിലെ മത്സരങ്ങളിൽ 12 മണിക്കൂറിലധികം ആഹാരം കഴിക്കാതെ കാത്തിരിക്കേണ്ടി വന്നതായി മത്സരാർത്ഥികൾ പറഞ്ഞു.