കൊച്ചി: കേരളകൗമുദിയും പ്രാണ ഇൻസൈറ്റും ചേർന്ന് സംഘടിപ്പിക്കുന്ന സോഷ്യൽ മീഡിയ ഇൻഫ്ളുവൻസേഴ്സ് സംഗമം നാളെ (ഞായർ)രാവിലെ 10.30 മുതൽ എറണാകുളം ഹോളിഡേ ഇന്നിൽ നടക്കും. തിരഞ്ഞെടുത്ത പ്രമുഖ വ്യക്തിത്വങ്ങൾക്ക് പുറമെ വിവിധ ജില്ലകളിൽ നിന്നായി നിരവധിപേർ സംഗമത്തിൽ പങ്കെടുക്കും.

അനുദിനം വളരുന്ന സോഷ്യൽ മീഡിയ സമൂഹത്തിൽ ചെലുത്തുന്ന സ്വാധീനം നിർണായമായ കാലഘട്ടത്തിൽ ഇതിൽ മികവ് തെളിയിക്കുന്നവർക്ക് ഒത്തുചേരാനും അവരിൽ തിരഞ്ഞെടുക്കപ്പെട്ടവർക്ക് അവാർഡ് നൽകാനുമാണ് ട്രെൻഡ് സെറ്റേഴ്സ് എന്ന പേരിലുള്ള സംഗമം.
സംഗമത്തിൽ പങ്കെടുക്കുന്നവർക്ക് പ്രശസ്ത സിനിമാതാരം ആശാ ശരത്തുമായി സൗഹൃദഭാഷണം നടത്താനുള്ള അവസരമുണ്ടാകും. ഉച്ചഭക്ഷണത്തിനുശേഷം ചർച്ച നടക്കും. സമൂഹത്തിൽ വർദ്ധിച്ചുവരുന്ന സോഷ്യൽ മീഡിയയുടെ സ്വാധീനശക്തിയെക്കുറിച്ചുള്ള ചർച്ചയ്ക്ക് പ്രമുഖ മാദ്ധ്യമപ്രവർത്തകർ നേതൃത്വം നൽകും. സോഷ്യൽ മീഡിയയിൽ വ്യക്തിമുദ്ര പതിപ്പിച്ച പ്രശസ്തരും പങ്കാളികളാകും.
വൈകിട്ട് 4.30ന് ചേരുന്ന സമ്മേളനത്തിന്റെ ഉദ്ഘാടനവും തിരഞ്ഞെടുക്കപ്പെട്ട ട്രെൻഡ് സെറ്റേഴ്സിനുള്ള അവാർഡ് വിതരണവും സഹകരണ രജിസ്ട്രേഷൻ വകുപ്പ് മന്ത്രി വി.എൻ. വാസവൻ നിർവഹിക്കും.