വൈപ്പിൻ: കൊച്ചിൻ ദേവസ്വം ബോർഡ് എളങ്കുന്നപ്പുഴ ശ്രീ സുബ്രഹ്മണ്യ സ്വാമി ക്ഷേത്രത്തിൽ പൊഴുതൂൺ നാട്ടൽ കർമ്മം നടത്തി. ക്ഷേത്രോത്സവം തുടങ്ങുന്നതിന് ദിവസങ്ങൾക്ക് മുൻപാണ് ഈ ചടങ്ങ് നടക്കുന്നത്. തന്ത്രിയോ ശാന്തിക്കാരോ കൂടാതെ ആചാരി തന്നെ പൂർവാചാരവിധിപ്രകാരം നാളികേരം ഉടച്ച് പൂജ നടത്തി തിരുവുത്സവത്തിന്റെ ലക്ഷണം നിർണയിക്കുന്ന ചടങ്ങാണ് പൊഴുതൂൺ നാട്ടൽ.

നാലുകോലിന് മീതെ ഉയരമുള്ള കുറ്റിയിൽ ചന്ദനം, മാല, മാവില, കുരുത്തോല എന്നിവ ചാർത്തി പൊഴുതൂണായി ക്ഷേത്രത്തിന്റെ വടക്ക് ഭാഗത്തായി സ്ഥാപിച്ചു. മാനം കണ്ണേഴത്ത് ചന്ദ്രൻ ആചാരി മുഖ്യ കാർമികത്വം വഹിച്ചു.

ദേവസ്വം ഓഫീസർ എ.ആർ.രാജീവ്, ക്ഷേത്ര ഉപദേശക സമിതി പ്രസിഡന്റ് ടി.കെ.രാജഗോപാൽ, സെക്രട്ടറി ബൈജു മേയ്ക്കാട്ട്, മേൽശാന്തി ഹരിശങ്കർ എമ്പ്രാന്തിരി എന്നിവർ പങ്കെടുത്തു.ഈ വർഷത്തെ ഉത്സവം നവംബർ 28ന് കൊടിയേറി ഡിസംബർ 7 ന് സമാപിക്കും.