കൊച്ചി: സോഷ്യൽ മീഡിയയിലൂടെ ജനങ്ങളെ സ്വാധീനിക്കുന്നവരെ ആദരിക്കാൻ കേരളകൗമുദിയും പ്രാണ ഇൻസൈറ്റും ചേർന്ന് ഒരുക്കുന്ന സോഷ്യൽ മീഡിയ ഇൻഫ്‌ളുവൻസേഴ്‌സ് സംഗമം ഇന്ന് കൊച്ചിയിൽ. രാവിലെ 10.30ന് എറണാകുളം ഹോളിഡേ ഇൻ ഹോട്ടലിൽ നടക്കുന്ന പരിപാടിയിൽ തിരഞ്ഞെടുത്ത വ്യക്തികളും വിവിധ ജില്ലകളിൽ നിന്നുള്ളവരും പങ്കെടുക്കും.

അനുദിനം വളരുന്ന സോഷ്യൽ മീഡിയ സമൂഹത്തിൽ ചെലുത്തുന്ന സ്വാധീനം നിർണായമായ കാലഘട്ടത്തിൽ മികവ് തെളിയിക്കുന്നവർക്ക് ഒത്തുചേരാനും അവരിൽ തിരഞ്ഞെടുക്കപ്പെട്ടവർക്ക് അവാർഡ് നൽകി ആദരിക്കാനുമാണ് ട്രെൻഡ് സെറ്റേഴ്‌സ് സംഗമം ഒരുക്കുന്നത്.
സംഗമത്തിൽ പങ്കെടുക്കുന്നവർ പ്രശസ്ത സിനിമാതാരവും നർത്തകിയുമായ ആശാ ശരത്തുമായി സൗഹൃദഭാഷണം നടത്തും. സമൂഹത്തിൽ വർദ്ധിച്ചുവരുന്ന സോഷ്യൽ മീഡിയയുടെ സ്വാധീനശക്തിയെക്കുറിച്ച് ഉച്ചയ്ക്കുശേഷം സംഘടിപ്പിക്കുന്ന ചർച്ച പ്രമുഖ മാദ്ധ്യമപ്രവർത്തകർ നയിക്കും. സോഷ്യൽ മീഡിയയിൽ വ്യക്തിമുദ്ര പതിപ്പിച്ച പ്രശസ്തരും പങ്കാളികളാകും.
വൈകിട്ട് 4.30ന് ചേരുന്ന സമ്മേളനത്തിന്റെ ഉദ്ഘാടനവും ട്രെൻഡ് സെറ്റേഴ്‌സിനുള്ള അവാർഡ് വിതരണവും സഹകരണ രജിസ്‌ട്രേഷൻ വകുപ്പ് മന്ത്രി വി.എൻ. വാസവൻ നിർവഹിക്കും.