വൈപ്പിൻ: വൈപ്പിൻ ഉപജില്ല സ്‌കൂൾ കലോത്സവത്തിന് ഇന്ന് തിരിതെളിയും. 19, 21, 22, 23 തീയതികളിൽ 173 മത്സര ഇനങ്ങളിലായി 1700 കുട്ടികൾ മാറ്റുരയ്ക്കും. ഏഴു വേദികളിലായാണ് മത്സരങ്ങൾ. ചെറായി സഹോദരൻ മെമ്മോറിയൽ ഹൈസ്‌കൂളിൽ ഇന്ന് വൈകി​ട്ട് നാലിന് ഹൈബി ഈഡൻ എം. പി ഉദ്ഘാടനം ചെയ്യും. കെ.എൻ. ഉണ്ണിക്കൃഷ്ണൻ എം.എൽ.എ അദ്ധ്യക്ഷതവഹി​ക്കും. ഉദ്ഘാടനത്തിന് മുന്നോടിയായി വിളംബരഘോഷയാത്രയും 300 കുട്ടികൾ ലോഗോ പ്രകാശനവും പന്തലിന്റെ കാൽനാട്ടും നടത്തി.

ഭക്ഷണമടക്കം വിദ്യാർത്ഥികൾക്ക് വേണ്ട സൗകര്യങ്ങളെല്ലാം ഉറപ്പാക്കിയതായി​ എം.എൽ.എ അറിയിച്ചു.
സമാപന സമ്മേളനം ചെറായി എസ്.എം. എച്ച്. എസിൽ 23ന് വൈകി​ട്ട് നാലിന് കെ. എൻ. ഉണ്ണിക്കൃഷ്ണൻ എം.എൽ.എ. ഉദ്ഘാടനം ചെയ്യും. വൈപ്പിൻ ബ്ലോക്ക് പഞ്ചായത്ത് പ്രസിഡന്റ് തുളസി സോമൻ അദ്ധ്യക്ഷത വഹി​ക്കും.
കെ.എൻ. ഉണ്ണി​ക്കൃഷ്ണൻ എം.എൽ.എ, എ.ഇ.ഒ ഇബ്രഹിംകുട്ടി രായരോത്ത്, ചെറായി എസ്. എം. സ്‌കൂൾ മാനേജർ കെ.എസ്. ജയപ്പൻ, ജനറൽ കൺവീനർ എ.ജി. ജെയ്‌സി, പ്രോഗ്രാം കമ്മിറ്റി കൺവീനർ ബിനു തോമസ്, പബ്ലിസിറ്റി കമ്മിറ്റി കൺവീനർ എ. എ. സുധീർ എന്നിവർ വി​ശദീകരി​ച്ചു.