കൊച്ചി: സവർണ ജാതി​ സംവരണത്തി​ലൂടെ രാജ്യത്തെ സാമൂഹ്യനീതി​ അപകടത്തി​ലായെന്ന് ഭരണഘടന വിദഗ്ദ്ധൻ ഡോ. ജി​.മോഹൻ ഗോപാൽ. ഓൾ ഇന്ത്യ ബാക്ക്വേഡ് ക്ലാസസ് ഫെഡറേഷന്റെയും സംവരണ സമുദായ മുന്നണിയുടെയും ആഭിമുഖ്യത്തിൽ നടന്ന അവകാശ പ്രഖ്യാപന സമ്മേളനത്തി​ൽ സംസാരി​ക്കുകയായി​രുന്നു അദ്ദേഹം. പി​ന്നാക്ക സംവരണം തന്നെ നിർത്തലാക്കിയേക്കുമെന്ന സാഹചര്യമാണി​പ്പോൾ. ഈ നീക്കത്തെ എതി​ർക്കാൻ ആരുമി​ല്ലാത്ത സ്ഥി​തി​യുമുണ്ട്. യാതൊരു ചർച്ചയുമില്ലാതെ ബി.ജെ.പി ഭരണഘടനാ ഭേദഗതി കൊണ്ടുവരുമ്പോൾ കോൺഗ്രസും ഇടതുപക്ഷവുമൊക്കെ അതിന് വോട്ട് ചെയ്യുന്നു. അവരുടെ ഉദ്ദേശം സാമൂഹിക നീതിയെ തകർക്കലാണെന്ന് വ്യക്തമായി​ക്കഴി​ഞ്ഞു. ഇതി​ലൂടെ ഭരണഘടനയെയാണ് ആക്രമിക്കുന്നത്. രാജ്യത്തിന്റെ അടിത്തറയായ ഭരണഘടനയെയും സാമൂഹിക നീതിയെയും സംരക്ഷി​ക്കാൻ പോരാടി​യേ തീരു. രാജ്യത്തിന്റെ ശക്തി​ പിന്നാക്ക വിഭാഗങ്ങളാണ്. അവരി​ലൂടെയേ രാജ്യത്തിന് മുന്നോട്ടുപോകാനാകൂവെന്നും അദ്ദേഹം പറഞ്ഞു. നേതൃ സംഗമം ഇ.ടി. മുഹമ്മദ് ബഷീർ എം.പി ഉദ്ഘാടനം ചെയ്തു. സംവരണ സമുദായ മുന്നണി പ്രസിഡന്റ് എസ്.കുട്ടപ്പൻ ചെട്ടിയാർ അദ്ധ്യക്ഷത വഹിച്ചു. ഓൾ ഇന്ത്യ ബാക്ക്വേഡ് ക്ലാസസ് പ്രസിഡന്റ് വി.ആർ.ജോഷി വിഷയം അവതരി​പ്പി​ച്ചു. പ്രൊഫ.എം.കെ.സാനു, മുൻ മന്ത്രിമാരായ നീലലോഹിതദാസൻ നാടാർ, കുട്ടി അഹമ്മദ് കുട്ടി, മുൻ എം.എൽ.എ ടി.എ.അഹമ്മദ് കബീർ, ദളി​ത് സമുദായ മുന്നണി ചെയർമാൻ സണ്ണി കപിക്കാട്, അഡ്വ.എ.എൻ.രാജൻ ബാബു, സംസ്ഥാന പട്ടികജാതി പട്ടിക വർഗ കമ്മീഷൻ ബി.എസ്. മാവോജി എന്നിവർ പങ്കെടുത്തു.