കൊച്ചി: ആൻവി ഫ്രഷ് പ്രൈവറ്റ് ലിമിറ്റഡ് എന്ന സ്ഥാപനത്തിന്റെ ഫ്രാഞ്ചൈസി നൽകാമെന്ന് പറഞ്ഞ് വിശ്വസിപ്പിച്ച് നിരവധിപേരിൽ നിന്നായി കോടികൾ തട്ടിയെടുത്ത കേസിൽ മുഖ്യപ്രതിയായ കമ്പനി എം.ഡിയെ പൊലീസ് അറസ്റ്റ് ചെയ്തു.

തിരുവനന്തപുരം ബാലരാമപുരം സ്വദേശി വിപിൻ വി.എസ് (38) ആണ് അറസ്റ്റിലായത്. എറണാകുളം ഓൾഡ് റെയിൽവേ സ്റ്റേഷൻ റോഡ് ആസ്ഥാനമായുള്ള ആൻവി ഫ്രഷ് ആരംഭിക്കുന്ന നോൺ വെജ് സൂപ്പർമാർക്കറ്റിന് ഫ്രാഞ്ചൈസികൾ നൽകാമെന്ന് പരസ്യം നൽകിയാണ് പ്രതിയും ഭാര്യ ഉൾപ്പെടെയുള്ള കൂട്ടുപ്രതികളും ചേർന്ന് തട്ടിപ്പ് നടത്തിയത്.

വഞ്ചിതരായവരുടെ പരാതിയിൽ നിലവിൽ 9 കേസുകൾ എറണാകുളം സെൻട്രൽ പൊലീസ് അന്വേഷിക്കുന്നുണ്ട്. 150 ഓളം പേരിൽനിന്ന് 22 കോടി രൂപ പ്രതികൾ തട്ടിയെടുത്തെന്നാണ് വിവരം. നിലവിൽ 125 പേരുടെ പരാതി പൊലീസിൽ ലഭിച്ചിട്ടുണ്ട്.