തിരഞ്ഞെടുപ്പ് നടക്കുന്ന വാർഡുകളിൽ നവംബർ 9 ന് പ്രദേശിക അവധി

ഇടുക്കി :ജില്ലയിൽ നവംബർ 9 ന് ഉപതിരഞ്ഞെടുപ്പ് നടക്കുന്ന ഇളംദേശം ബ്ലോക്കിലെ വണ്ണപ്പുറം ഡിവിഷൻ (01) ശാന്തൻപാറ പഞ്ചായത്തിലെ വാർഡ് 10 (തൊട്ടിക്കാനം), കഞ്ഞിക്കുഴി ഗ്രാമപഞ്ചായത്തിലെ വാർഡ് 18 (പൊന്നെടുത്താൽ), കരുണാപുരം ഗ്രാമപഞ്ചായത്തിലെ വാർഡ് 16 (കുഴിക്കണ്ടം) എന്നിവിടങ്ങളിൽ ഉപതിരഞ്ഞെടുപ്പുമായി ബന്ധപ്പെട്ട മുന്നൊരുക്കങ്ങൾ പൂർത്തിയായതായി ജില്ലാ കളക്ടർ ഷീബ ജോർജ് അറിയിച്ചു. ഉപതിരഞ്ഞെടുപ്പ് നടക്കുന്ന വാർഡുകളിലെ ജീവനക്കാർക്ക് ഈ വാർഡുകളിലെ വോട്ടറാണെന്ന് തെളിയിക്കുന്ന രേഖ സഹിതം അപേക്ഷിക്കുന്ന പക്ഷം സ്വന്തം പോളിംഗ് സ്റ്റേഷനിൽ പോയി വോട്ട് ചെയ്യുന്നതിന് പ്രത്യേക അനുമതി നൽകുന്നതിന് എല്ലാ ജില്ലാതല ഓഫീസർമാർക്കും നിർദ്ദേശം നൽകി.
നവംബർ 9 ന് തിരഞ്ഞെടുപ്പ് നടക്കുന്ന വാർഡുകളിലെ എല്ലാ സർക്കാർ സ്ഥാപനങ്ങൾക്കും, വിദ്യാഭ്യാസസ്ഥാപനങ്ങൾക്കും ജില്ലാ കളക്ടർ പ്രാദേശിക അവധി പ്രഖ്യാപിച്ചു. പോളിംഗ് ബൂത്തുകളായി പ്രവൃത്തിക്കുന്ന വിദ്യാഭ്യാസസ്ഥാപനങ്ങൾക്ക് വേട്ടെടുപ്പിന്റെ തലേദിവസവും അവധിയായിരിക്കും. നവംബർ 7 വൈകിട്ട് 6 മണി മുതൽ വോട്ടെണ്ണൽ ദിനമായ നവംബർ 10 വരെ മദ്യഷാപ്പുകളും ബീവറേജസ് മദ്യ വിൽപ്പന ശാലകളും അടച്ചിട്ട് ഡ്രൈ ഡേ ആചരിക്കാനും കളക്ടർ ഉത്തരവിട്ടു.