ഇടുക്കി: ഇളംദേശം ബ്ലോക്കിലെ വണ്ണപ്പുറം ഡിവിഷൻ (01), ശാന്തൻപാറ പഞ്ചായത്തിലെ വാർഡ് 10 (തൊട്ടിക്കാനം), കഞ്ഞിക്കുഴി ഗ്രാമപഞ്ചായത്തിലെ വാർഡ് 18 (പൊന്നെടുത്താൽ), കരുണാപുരം ഗ്രാമപഞ്ചായത്തിലെ വാർഡ് 16 (കുഴിക്കണ്ടം) എന്നിവിടങ്ങളിലെ ഉപതിരഞ്ഞെടുപ്പ് നാളെ നടക്കും. ഇതിനുള്ള മുന്നൊരുക്കങ്ങൾ പൂർത്തിയാക്കിയിട്ടുണ്ട്. ഉപതിരഞ്ഞെടുപ്പ് നടക്കുന്ന വാർഡുകളിലെ എല്ലാ സർക്കാർ സ്ഥാപനങ്ങൾക്കും വിദ്യാഭ്യാസസ്ഥാപനങ്ങൾക്കും ജില്ലാ കളക്ടർ പ്രാദേശിക അവധി പ്രഖ്യാപിച്ചിട്ടുണ്ട്. പോളിംഗ് ബൂത്തുകളായി പ്രവർത്തിക്കുന്ന വിദ്യാഭ്യാസസ്ഥാപനങ്ങൾക്ക് ഇന്ന് അവധിയായിരിക്കും. ഈ വാർഡുകളിൽ വോട്ടെണ്ണൽ ദിനമായ നവംബർ 10 വരെ മദ്യഷാപ്പുകളും ബീവറേജസ് മദ്യ വിൽപ്പന ശാലകളും അടച്ചിട്ട് ഡ്രൈ ഡേ ആചരിക്കാനും കളക്ടർ ഉത്തരവിട്ടു.