ചെറുതോണി​: ഓരോ ഭവനത്തിലും കാർഷിക പോഷക ഉദ്യാനങ്ങൾ സജ്ജീകരിക്കുക എന്ന ലക്ഷ്യത്തോടെ കുടുംബശ്രീ നടപ്പിലാക്കുന്ന അഗ്രി ന്യൂട്രി ഗാർഡൻ ക്യാമ്പയിനിന്റെ ജില്ലാതല ഉദ്ഘാടനം ചെറുതോണി ടൗൺഹാളിൽ ജില്ലാ പഞ്ചായത്ത് പ്രസിഡന്റ് ജിജി.കെ ഫിലിപ്പ് നിർവഹിച്ചു.
വാഴത്തോപ്പ് ഗ്രാമ പഞ്ചായത്ത് പ്രസിഡന്റ് ജോർജ് പോൾ ചടങ്ങിൽ അദ്ധ്യക്ഷനായി. പാമ്പാടുംപാറ കാർഡമം റിസർച്ച് സ്റ്റേഷൻ അസിസ്റ്റന്റ് പ്രൊഫസർ പ്രീതി ടി. ടി യുടെ നേതൃത്വത്തിൽ 'ചെറുധാന്യങ്ങളുടെ കൃഷി' എന്ന വിഷയത്തിൽ സെമിനാർ സംഘടിപ്പിച്ചു.
ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രൻ, വാഴത്തോപ്പ് ഗ്രാമ പഞ്ചായത്ത് വൈസ് പ്രസിഡന്റ് മിനി ജേക്കബ്, ജില്ലാ പഞ്ചായത്ത് അംഗം കെ.ജി സത്യൻ ബ്ലോക്ക് പഞ്ചായത്ത് അംഗം ഡിറ്റാജ് ജോസഫ്, ഗ്രാമപഞ്ചായത്ത് അംഗങ്ങളായ ആലീസ് ജോസ്, നിമ്മി ജയൻ, രാജു ജോസഫ്, സി.ഡി.എസ് ചെയർപേഴ്‌സൺ വിജുമോൾ കണ്ണൻ, കുടുംബശ്രീ ജില്ലാ പ്രോഗ്രാം മാനേജർ രാംനേഷ് പി.ആർ, കൃഷിഭവൻ ഉദ്യോഗസ്ഥർ, കുടുംബശ്രീ അംഗങ്ങൾ എന്നിവർ പങ്കെടുത്തു.

50 കുടുംബങ്ങളുടെ ക്ലസ്റ്റർ

പോഷകാഹാരക്കുറവ് പരിഹരിക്കുന്നതിന് പ്രാദേശിക കാലാവസ്ഥയ്ക്ക് അനുയോജ്യമായ പച്ചക്കറികളും പഴവർഗങ്ങളും വീടുകളിൽ സ്വന്തമായി നട്ടുവളർത്തുക, ഓരോ വീട്ടിലും പോഷക സമൃദ്ധമായ ഭക്ഷണം ഉറപ്പുവരുത്തുക, ഇതുവഴി അധിക വരുമാനം ലഭ്യമാക്കുക എന്നിവയാണ് ക്വാമ്പയിനിന്റെ ലക്ഷ്യം. പദ്ധതിയുടെ ഭാഗമായി ജില്ലയിലെ ഗ്രാമീണ വാർഡുകളിൽ നിന്നും കുറഞ്ഞത് മൂന്ന് സെന്റിൽ പോഷക തോട്ടങ്ങൾ നിർമ്മിക്കാൻ സാധിക്കുന്ന 50 കുടുംബങ്ങളുടെ ക്ലസ്റ്റർ രൂപീകരിക്കുകയും ഇവർക്ക് വേണ്ട അഞ്ചുതരം പച്ചക്കറികളുടെ വിത്തുകളും പരിശീലനവും നൽകുകയാണ് ചെയ്യുക. ഇവ കൂടാതെ രണ്ടു തരം പ്രാദേശിക പഴവർഗ ചെടികൾ അംഗങ്ങൾ സ്വന്തമായി പോഷകത്തോട്ടത്തിൽ നട്ടു പിടിപ്പിക്കുകയും വേണം.