കട്ടപ്പന: യുവജനങ്ങളുടെ സർഗ്ഗശേഷിയെ കണ്ടെത്തുന്നതിനും വികസിപ്പിക്കുന്നതിനും ലക്ഷ്യമിട്ടു സംഘടിപ്പിക്കുന്ന കേരളോത്സവം കട്ടപ്പന നഗരസഭ കോൺഫറൻസ് ഹാളിൽ അദ്ധ്യക്ഷ ഷൈനി സണ്ണി ചെറിയാൻ ഉദ്ഘാടനം ചെയ്തു. വിദ്യാഭ്യാസ സ്റ്റാൻഡിങ് കമ്മറ്റി ചെയർപേഴ്‌സൺ മായ ബിജു അദ്ധ്യക്ഷത വഹിച്ചു.
സംസ്ഥാന യുവജനക്ഷേമ ബോർഡ്, വിവിധ തദ്ദേശ സ്വയംഭരണ സ്ഥാപനങ്ങൾ, സർക്കാർ വകുപ്പുകൾ, യൂത്ത് ക്ലബുകൾ എന്നിവയുടെ സഹകരണത്തോടെയാണ് കേരളോത്സവം നടത്തുന്നത്. ക്രിക്കറ്റ്, ഫുട്‌ബോൾ, വോളിബോൾ, ഷട്ടിൽ, ലോങ് ജമ്പ്, 100, 200, 800 മീറ്റർ ഓട്ടം 400 മീറ്റർ റിലേ തുടങ്ങിയ കായിക മത്സരങ്ങളും വിവിധ കലാ മത്സരങ്ങളും സംഘടിപ്പിക്കുന്നുണ്ട്. രണ്ട് ദിവസങ്ങളിലായി നടക്കുന്ന കേരളോത്സവം ഇന്ന് സമാപിക്കും.
വൈസ് ചെയർമാൻ ജോയി ആനിതോട്ടം, നഗരസഭ അംഗങ്ങളായ സിബി പാറപ്പായിൽ, ജോയി വെട്ടികുഴി, മനോജ് മുരളി, നഗരസഭ സെക്രട്ടറി പ്രകാശ് കുമാർ വി, രാഷ്ട്രീയ സാംസ്‌കാരിക പ്രവർത്തകർ, യുവജന സംഘടനാ പ്രതിനിധികൾ, യൂത്ത് ക്ലബ് ഭാരവാഹികൾ തുടങ്ങിയവർ യോഗത്തിൽ പങ്കെടുത്തു.