'ഗോൾ പദ്ധതി' ക്യാമ്പയിൻ ഉദ്ഘാടനം ചെയ്തു
ഇടുക്കി:ലോകകപ്പിനോടനുബന്ധിച്ച് ലഹരി വിരുദ്ധ സന്ദേശം പ്രചരിപ്പിക്കുന്നതിന്റെ ഭാഗമായി 'ഗോൾ പദ്ധതി' ക്യാമ്പയിൻ കളക്ട്രേറ്റ് കോമ്പൗണ്ടിൽ ജില്ലാ കളക്ടർ ഷീബാ ജോർജ് ഗോളടിച്ച് ഉദ്ഘാടനം ചെയ്തു. ജില്ലാ സ്‌പോർട്‌സ് കൗൺസിൽ പ്രസിഡന്റ് റോമിയോ സെബാസ്റ്റ്യൻ അദ്ധ്യക്ഷത വഹിച്ചു. ജില്ലാ പൊലീസ്‌ മേധാവി വി.യു. കുര്യാക്കോസ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. എല്ലാ വിഭാഗക്കാരിലേക്കും ലോകകപ്പ് സന്ദേശം എത്തിക്കുക, താത്പര്യമുള്ള കുട്ടികൾക്ക് ഹ്രസ്വകാലത്തേക്ക് അടിസ്ഥാന പരിശീലനം നൽകുക, മികവു പുലർത്തുന്നവർക്ക് വിദഗ്ദ്ധ പരിശീലനം നൽകുക എന്നിവയിലൂടെ പുതുകായിക സംസ്‌കാരം വളർത്തുക, ലഹരി വിരുദ്ധ സന്ദേശം പ്രചരിപ്പിക്കുക എന്നിവയാണ് ക്യാമ്പയിന്റെ ലക്ഷ്യം. ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രൻ, എ.ഡി.എം ഷൈജു പി. ജേക്കബ്, ബ്ലോക്ക് പഞ്ചായത്ത് അംഗം ഡിറ്റാജ്‌ ജോസഫ്, ജില്ലാ സ്‌പോർട്‌സ് കൗൺസിൽ സെക്രട്ടറി ഷൈൻ എൻ.പി, ജില്ലാ സ്‌പോർട്‌സ് ഓഫീസർ ഇൻ ചാർജ് ദീപ്തി മരിയ ജോസ്, കളക്ട്രേറ്റ് ജീവനക്കാർ എന്നിവർ പങ്കെടുത്തു. ലോകകപ്പ് മത്സരം തുടങ്ങുന്നത് മുതൽ സ്‌പോർട്‌സ് കൗൺസിൽ നേതൃത്വത്തിൽ ബിഗ് സ്‌ക്രീൻ പ്രദർശനവും ഒരുക്കാനുദ്ദേശിക്കുന്നുണ്ട്.