തൊടുപുഴ/മൂലമറ്റം: രക്ത സാക്ഷി കെ.എസ്. കൃഷ്ണപിള്ളയുടെ രക്തസാക്ഷി ദിനാചരണത്തോടനുബന്ധിച്ച് ഇന്ന് സി.പി.ഐ തൊടുപുഴ, മൂലമറ്റം മണ്ഡലം കമ്മിറ്റികളുടെ നേതൃത്വത്തിൽ വമ്പിച്ച പ്രകടനവും പൊതുസമ്മേളനവും നടക്കും. തൊടുപുഴ മണ്ഡലം കമ്മിറ്റിയുടെ നേതൃത്വത്തിൽ നടക്കുന്ന രക്തസാക്ഷി ദിനാചരണം ഇന്ന് വൈകിട്ട് 4.30ന് പ്രകടനത്തോടെ ആരംഭിക്കും. വെങ്ങല്ലൂർ ഷാപ്പുംപടിയിൽ നിന്ന് ആരംഭിക്കുന്ന പ്രകടനം വാദ്യമേളങ്ങളുടെ അകമ്പടിയോടെ സിവിൽ സ്റ്റേഷൻ പരിസരത്ത് സജ്ജീകരിച്ച പ്രത്യേകം തയ്യാറാക്കിയ സമ്മേളന വേദിയിൽ സമാപിക്കും. തുടർന്ന് നടക്കുന്ന പൊതുസമ്മേളനം സംസ്ഥാന റവന്യൂ വകുപ്പ് മന്ത്രി കെ. രാജൻ ഉദ്ഘാടനം ചെയ്യും. സി.പി.ഐ ജില്ലാ സെക്രട്ടറി കെ. സലിംകുമാർ, സംസ്ഥാന കൗൺസിലംഗം കെ.കെ. ശിവരാമൻ, മണ്ഡലം സെക്രട്ടറി വി.ആർ. പ്രമോദ്, നേതാക്കളായ മാത്യൂ വർഗീസ്, സുനിൽ സെബാസ്റ്റ്യൻ, പി.പി. ജോയി, മുഹമ്മദ് അഫ്‌സൽ, അഡ്വ. എബി ഡി കോലോത്ത് തുടങ്ങിയവർ പങ്കെടുക്കും. സി.പി.ഐ മൂലമറ്റം മണ്ഡലം കമ്മിറ്റിയുടെ നേതൃത്വത്തിൽ നടക്കുന്ന പരിപാടി കാഞ്ഞാറിൽ വൈകിട്ട് 4.30ന് പ്രകടനത്തോടെ ആരംഭിക്കും. കുടയത്തൂർ മുസ്ലിം പള്ളി ജംഗ്ഷനിൽ നിന്ന് ആരംഭിക്കുന്ന പ്രകടനം കാഞ്ഞാർ ടൗൺ ചുറ്റി സമ്മേളന വേദിയിൽ സമാപിക്കും. തുടർന്ന് നടക്കുന്ന പൊതുസമ്മേളനം കൃഷി മന്ത്രി പി. പ്രസാദ് ഉദ്ഘാടനം ചെയ്യും. സി.പി.ഐ ജില്ലാ സെക്രട്ടറി കെ. സലിംകുമാർ, കെ.കെ. ശിവരാമൻ, മണ്ഡലം സെക്രട്ടറിമാരായ സുനിൽ സെബാസ്റ്റ്യൻ, വി.ആർ. പ്രമോദ്, എ. സുരേഷ് കുമാർ, ഗീത തുളസീധരൻ, പി.എം. തോമസ് എന്നിവർ പങ്കെടുക്കും.