ചിങ്ങവനം : ​ചിങ്ങവനം ​​ഗോമതിക്കവലയിലെ അശാസ്ത്രീയമായ ഡിവൈഡർ വീണ്ടും ഒരാളുടെ ജീവനെടുത്തു. പരിപ്പ് സ്വദേശി ക്ളിന്റിന്റെ മരണത്തിന് കാരണമായ ഡിവൈഡർ പതിവ് വാഹനാപകടങ്ങളുടെ കേന്ദ്രമാണ്. നിർമ്മാണത്തിലെ അപാകതയാണ് അപകടങ്ങൾക്കിടയാക്കുന്നത്. കോട്ടയം, പന്നിമറ്റം, ചിങ്ങവനം ഭാ​ഗത്ത് നിന്നെത്തുന്ന വാഹനങ്ങൾ ഒന്ന് നിയന്ത്രണം തെറ്റിയാൽ ഇടിച്ചുകയറുന്നത് ഡിവൈഡറിലേക്കാണ്. കോട്ടയത്തു നിന്നും എത്തുന്ന വാഹനങ്ങളാണ് കൂടുതലായും അപകടത്തിൽപ്പെടുന്നത്. അതിവേ​ഗത്തിൽ ഇറക്കിമിറങ്ങിയെത്തുന്ന വാഹനങ്ങൾ നിയന്ത്രിക്കാൻ സ്പീഡ് ​ബ്രേക്കറോ മുന്നറിയിപ്പ് സിഗ്നലോ ഇല്ല. ​ഗോമതിക്കവലയിലെ സി​ഗ്നൽ ലൈറ്റുകൾ തെളിയാതായിട്ട് നാളുകളേറയായി. പരാതികൾ നൽകിയെങ്കിലും അപകടങ്ങൾ കുറയ്ക്കാൻ യാതൊരു നടപടിയും അധികൃതരുടെ ഭാ​ഗത്തുനിന്നുണ്ടായില്ലെന്ന് നാട്ടുകാർ പറയുന്നു.

റിഫ്ലക്ടർ സ്ഥാപിച്ചിട്ടും രക്ഷയില്ല

അപകടങ്ങൾ സ്ഥിരമായതോടെ കഴിഞ്ഞ ദിവസമാണ് ഡിവൈഡറിൽ റിഫ്ലക്ടർ സ്ഥാപിച്ചത്. എന്നാൽ ഇതുകൊണ്ടും പ്രയോജനമില്ല. വാഹനങ്ങൾ ഇടിച്ച് ഡിവൈഡറിന്റെ വശങ്ങൾ ഇടിഞ്ഞുകിടക്കുകയാണ്. ഡിവൈഡറിന്റെ വീതി കുറയ്ക്കുകയോ നീക്കം ചെയ്യുകയോ ആണ് അപകടങ്ങൾ കുറയ്ക്കാനുള്ള മാർ​ഗം. കെ.എസ്.ടി.പി നിർമ്മിച്ച റോഡ് ദേശീയപാത അതോറിറ്റി ഏറ്റെടുത്തു. എം.സി റോഡിൽ ചിങ്ങവനം മുതൽ പുത്തൻപാലം വരെ അരകിലോമീറ്റർ സ്ഥിരം അപകടമേഖലയാണെന്ന് പൊലീസ് പറയുന്നു.

പരിഹാരമാർ​ഗങ്ങൾ
​ഡിവൈഡറിൽ മുന്നറിയിപ്പ് സി​ഗ്നലുകൾ സ്ഥാപിക്കുക, വീതി കുറയ്ക്കുക.
​സി​ഗ്നൽ ലൈറ്റ് പ്രവർത്തനക്ഷമമാക്കുക
വഴിവിളക്കുകൾ തെളിയണം, സ്പീഡ് ബ്രേക്കിംഗ് സംവിധാനം വേണം

'' പതിവായി ഞാൻ ഈ അപകടങ്ങൾ കാണുന്നതാണ്. രാത്രി അപകട ശബ്ദം കേട്ട് പലതവണ ഞെട്ടി എഴുന്നേറ്റിട്ടുണ്ട്. വഴിവിളക്കെങ്കിലും അത്യാവശമായി തെളിയിക്കണം''

പെണ്ണമ്മ, സമീപവാസി