മുണ്ടക്കയം: എസ്.എൻ.ഡി.പി യോഗം ഹൈറേഞ്ച് യൂണിയന്റെ ആഭിമുഖ്യത്തിൽ നടന്നുവരുന്ന പ്രീ മാര്യേജ് കൗൺസിലിംഗ് കോഴ്‌സിന്റെ 49ാമത് ബാച്ച് 'ഒരുക്കം 49' മുണ്ടക്കയം സൗത്ത് 2431ാം നമ്പർ കരിനിലം ശാഖാ ഹാളിൽ നടന്നു. ഫ്രീ മാര്യേജ് കൗൺസിലിംഗ് കോഴ്‌സ് ചെയർമാൻ ലാലിറ്റ്.എസ് തകടിയേലിന്റെ അദ്ധ്യക്ഷതയിൽ നടന്ന യോഗം യൂണിയൻ പ്രസിഡന്റ് ബാബു ഇടയാടിക്കുഴി ഉദ്ഘാടനം ചെയ്തു. കവിയും പ്രഭാഷകനുമായ കോട്ടയം വെള്ളൂർ ശക്തി ഭവനത്തിൽ പി.വി ശശിധരൻ രചിച്ച 'സന്തുഷ്ട ദാമ്പത്യത്തിന്റെ മനസ്സൊരുക്കം ' പുസ്തകത്തിന്റെ പ്രകാശനം കേരളകൗമുദി കോട്ടയം യൂണിറ്റ് ചീഫ് ആർ.ബാബുരാജ് യൂണിയൻ നേതാക്കൾക്ക് നൽകി നിർവഹിച്ചു. വിവിധ വിഷയങ്ങളെ ആസ്പദമാക്കി പി.വി ശശിധരൻ, ഡോ: രഞ്ജി ഐസക്, എം.ജി മണി, കെ.ജി സതീഷ് തുടങ്ങിയവർ ക്ലാസുകൾ നയിച്ചു. ഇന്ന് നടക്കുന്ന സമാപന സമ്മേളനം യൂണിയൻ സെക്രട്ടറി അഡ്വ: പി.ജീരാജ് ഉദ്ഘാടനം ചെയ്യും. കോഴ്‌സിൽ പങ്കെടുത്തവർക്കുള്ള സർട്ടിഫിക്കറ്റ് വിതരണം പെൻഷണേഴ്‌സ് ഫോറം സംസ്ഥാന വൈസ് പ്രസിഡന്റ് അനിത ഷാജി നിർവഹിക്കും.