കോട്ടയം: കടപ്ലാമറ്റം പഞ്ചായത്ത് പ്രസിഡന്റും കേരള കോൺഗ്രസ് (എം) നേതാവുമായ ജോയി കല്ലുപുര (78) നിര്യാതനായി. വയല നെല്ലിക്കുന്ന് കല്ലുപുര ഫ്രാൻസിസ് - ഏലിക്കുട്ടി ദമ്പതികളുടെ മകനാണ്. പാർട്ടി മണ്ഡലം കമ്മിറ്റിയിലെ വാക്കേറ്റത്തിനിടയിൽ കഴിഞ്ഞ ദിവസം കുഴഞ്ഞുവീണു ചികിത്സയിലായിരുന്നു. ഏഴിന്​ കേരളാ കോൺഗ്രസ് (എം) കടപ്ലാമറ്റം മണ്ഡലം കമ്മിറ്റി ഓഫീസിലായിരുന്നു സംഘർഷം. ഇതിനിടെ കുഴഞ്ഞുവീണ ജോയിയെ ആശുപത്രിയിൽ എത്തിക്കാൻ പ്രവർത്തകർ തയാറായില്ലെന്ന ആരോപണം വിവാദമായിരുന്നു. ജോയി പഞ്ചായത്ത് പ്രസിഡന്റ്​ സ്ഥാനം രാജിവെയ്ക്കുന്നതുമായി ബന്ധപ്പെട്ടാണ്​ തർക്കവും സംഘർഷവുമുണ്ടായത്. ജോയിയെ കേരള കോൺഗ്രസ് എം നേതാക്കൾ മാനസികമായി പീഡിപ്പിച്ചുവെന്നുകാട്ടി ഭാര്യ മുഖ്യമന്ത്രിക്കും പൊലീസിനും പരാതി നൽകിയിരുന്നു. പൊലീസ് കേസെടുക്കാത്തതിനെതിരെ യു.ഡി.എഫ് പ്രക്ഷോഭത്തിലേക്ക് നീങ്ങിയിരുന്നു.

ഭാര്യ: വെമ്പള്ളി തെക്കേടം ലിസമ്മ ജോയി. മകൾ: സ്വപ്ന. മരുമകൻ: സണ്ണി കരിമറ്റം. ഇന്ന് ഉച്ചയ്ക്ക് 2.30ന് കടപ്ലാമറ്റം പഞ്ചായത്ത് ഓഫീസിൽ പൊതുദർശനം. സംസ്കാരം നാളെ 10.30 ന് വയല സെന്റ് ജോർജ് പള്ളി സെമിത്തേരിയിൽ.