കോട്ടയം : കോടിമത പച്ചക്കറി മാർക്കറ്റിന് സമീപം നഗരസഭയുടെ കീഴിൽ സ്ഥാപിച്ചിരിക്കുന്ന നായ്ക്കളുടെ പ്രജനന നിയന്ത്രണ കേന്ദ്രം ഒടുവിൽ തുറക്കുന്നു. ഡിസംബർ 19 ന് മന്ത്രി വി.എൻ വാസവൻ ഉദ്​ഘാടനം ചെയ്യുമെന്ന് ​ ജില്ലാ പഞ്ചായത്ത് പ്രസിഡന്റ് ​ നിർമ്മല ജിമ്മി പത്രസമ്മേളനത്തിൽ പറഞ്ഞു. ജില്ലാ പഞ്ചായത്തിന്റെ നിരന്തരമായ ഇടപെടലുകൾക്കും ചർച്ചകൾക്കുമൊടുവിലാണ്​ സെന്റർ അനുവദിച്ചതെന്നും ഇതുകൂടാതെ രണ്ട്​ സെന്റർ കൂടി ഉടൻ ആരംഭിക്കുമെന്നും അവർ പറഞ്ഞു. തുടക്കത്തിൽ ദിവസം 10 നായ്ക്കളെ വീതം വന്ധീകരിക്കാനാണ് പദ്ധതി. കെട്ടിടത്തിന്റെ പ്ലമ്പിംഗ്, വയറിംഗ് ​ പണികൾ പൂർത്തിയായി. 50 കേജുകൾ സ്ഥാപിക്കാനുള്ള ടെൻഡർ നൽകിയിട്ടുണ്ട്. എ.സി, റഫ്രിജറേറ്റർ ഉൾപ്പെടെയുള്ള സൗകര്യമാണ് ഇനി ഒരുക്കാനുള്ളത്. സെ​ന്ററിൽ നിയമിക്കേണ്ട ഡോക്ടറുടെയും തിയേറ്റർ അസി​സ്റ്റ​ന്റി​ന്റെയും അഭിമുഖം നടന്നു. ഇതിൽ ഒരു ഡോക്ടറെ തി‍രഞ്ഞെടുത്തു. നാല് മൃ​ഗപരിപാലകർക്കായുള്ള അഭിമുഖം ഇന്ന് നടക്കും.

നായ്ക്കളെ പിടികൂടാൻ സന്നദ്ധത അറിയിച്ചത് 60 പേർ

നായ്ക്കളെ പിടികൂടാനായി അറുപത് പേർ സന്നദ്ധത അറിയിച്ചിട്ടുണ്ട്. ബ്ലോക്ക് പഞ്ചായത്ത് അടിസ്ഥാനത്തിലാണ് ഇവരെ നിയമിക്കുക. സംസ്ഥാനത്ത്​ ഏറ്റവും കൂടുതൽ നായ്ക്കൾക്ക് വാക്സിനേഷൻ നൽകിയത് കോട്ടയം ജില്ലയിലാണ്. 85 ശതമാനം വാക്സിനേഷൻ​ ജില്ലയിൽ പൂർത്തിയായി​. ആഫ്രിക്കൻ പന്നിപ്പനിയെത്തുടർന്ന് ജില്ലയിൽ കൊന്നൊടുക്കിയ പന്നികളുടെ ഉടമകൾക്കുള്ള നഷ്ടപരിഹാരം ഉടൻ നൽകുമെന്നും പ്രസി​ഡ​ന്റ് അറിയിച്ചു.

കോടിമതയിലുള്ള എ.ബി.സി സെ​ന്റർ സജ്ജമായിട്ടുണ്ട്. ആനിമൽ വെൽഫയർ ബോർഡി​ന്റെ നിബന്ധനകൾ പാലിച്ചായിരിക്കും പ്രവർത്തനം. കോട്ടയം ന​ഗരം, പള്ളം പ്രദേശങ്ങളിലെ നായ്ക്കളെയാണ് തുടക്കത്തിൽ വന്ധീകരിക്കുക

നിർമ്മല ജിമ്മി (ജില്ലാ പഞ്ചായത്ത് പ്രസിഡ​ന്റ്)