കറുകച്ചാൽ . പേര് തൈപ്രാൽ ജോയിയെന്നാണ്. പക്ഷെ കറുകച്ചാലുകാർ അറിയണമെങ്കിൽ കെ ആർ ഒ 33 ജോയിച്ചായൻ എന്ന് പറയേണ്ടിവരും. അത്രമേൽ സുപരിചിതമാണ് കറുത്ത മാർക്ക് ഫോർ അംബാസിഡറുമായി നാട് ചുറ്റുന്ന ജോയിയെ അവർക്ക്. 1984ൽ ജോയ് കൽക്കത്തയിൽ നിന്ന് റോഡ് മാർ​ഗം എത്തിച്ചതാണ് ഈ പടക്കുതിരയെ. അന്ന് അംബാസിഡർ ബുക്ക് ചെയ്താൽ ലഭിക്കാൻ ആറുമാസം മുതൽ ഒരു വർഷം വരെ സമയമെടുക്കും. അതിനാൽ ഹിന്ദുസ്ഥാൻ മോട്ടോഴ്സി​ന്റെ കമ്പനിയിൽ നേരിട്ട് പോയി കാർ വാങ്ങി. രണ്ടര ദിവസം കൊണ്ട് നാട്ടിലെത്തിച്ചു. 50 രൂപ മുടക്കി 33 എന്ന ഫാൻസി നമ്പർ സ്വന്തമാക്കി. ജില്ലയിലെ ആദ്യത്തെ ഫ്ലോർ ​ഗിയർ കാറാണിതെന്ന് ജോയി പറയുന്നു.

ആദ്യകാല മോഡലായ ഒ എച്ച് വി അംബാസിഡർ 1962 ൽ തൈപ്രാൽ വീട്ടിലെത്തുമ്പോൾ ജോയിക്ക് പ്രായം 11. പിതാവ് കുട്ടപ്പനായിരുന്നു 12,500 രൂപയ്ക്ക് കാർ വാങ്ങിയത്. കറുകച്ചാലിലെ മൂന്നാമത്തെ കാറായിരുന്നു അത്. ആ സമയം തന്നെ ജോയി ഡ്രൈവിം​ഗ് പഠിച്ചു. അന്ന് മുതൽ വാഹനങ്ങളുടെ ലോകത്തായി ജീവിതം. ഇതുവരെ ആയിരത്തോളം കാറുകൾ ജോയി വാങ്ങി ആവശ്യക്കാർക്ക് വിറ്റിട്ടുണ്ട്. നിലവിൽ ജോയിയുടെ പക്കൽ അ‍ഞ്ച് അംബാസിഡറുകളുണ്ട്. വാഹനം ഓടിച്ചുനോക്കി ഇഷ്ടപ്പെട്ടാൽ മറ്റൊന്നും ചിന്തിക്കാതെ വാങ്ങും. കമ്പനി നിറുത്തിയെങ്കിലും അംബാസിഡറി​ന്റെ എല്ലാ സ്പെയർ പാർട്സും ജോയിയുടെ കൈയ്യിൽ ഭദ്രമായുണ്ട്. എവിടെ അംബാസിഡർ കണ്ടാലും ജോയി ഇറങ്ങിച്ചെന്നു ചോദിക്കും."ഇത് കൊടുക്കാൻ താല്പര്യമുണ്ടോ.."