പാലാ: കടപ്പാട്ടൂർ പന്ത്രണ്ടാം മൈൽ ബൈപ്പാസ് ഇന്ന് മുതൽ പ്രകാശപൂരിതമാകുന്നു. സ്ഥലവാസികളുടെയും ബൈപ്പാസ് വഴി കടന്നുപോകുന്ന യാത്രികരുടെയും ഒരു പതിറ്റാണ്ടായി ഉയർന്ന ആവശ്യമാണ് ഇന്ന് സാക്ഷാത്കരിക്കപ്പെടുന്നത്. ജില്ലാ പഞ്ചായത്തിന്റെ പദ്ധതിയിൽ ഉൾപ്പെടുത്തി ജില്ലാ പഞ്ചായത്ത് മെമ്പർ ജോസ്‌മോൻ മുണ്ടയ്ക്കൽ അനുവദിച്ച 7 ലക്ഷം രൂപ ഉപയോഗിച്ച് ഒന്നരകിലോമീറ്റർ ദൂരത്തിൽ പുതുതായി ഇലക്ട്രിക് പോസ്റ്റ് സ്ഥാപിച്ച് ബഹുജനപങ്കാളിത്തത്തോടെ 30 വാട്ടിന്റെ എൽ.ഇ.ഡി. ബൾബിന്റെ സ്ട്രീറ്റ് ലൈറ്റ് ഫിറ്റിംഗ്‌സ് സ്ഥാപിക്കുകയും ചെയ്തു. പുതുതായി സ്ഥാപിച്ച തെരുവുവിളക്കുകളുടെ സ്വിച്ച് ഓൺ കർമ്മം ഇന്ന് വൈകുന്നേരം 6.30 ന് കടപ്പാട്ടൂർ ഇടച്ചേരി ജംഗ്ഷനിൽ വച്ച് ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി നിർവഹിക്കും. എൻ.എസ്.എസ്. താലൂക്ക് യൂണിയൻ പ്രസിഡന്റ് സി.പി. ചന്ദ്രൻനായർ അദ്ധ്യക്ഷത വഹിക്കും. ജില്ലാ പഞ്ചായത്ത് മെമ്പർ ജോസ്‌മോൻ മുണ്ടയ്ക്കൽ, ഗ്രാമപഞ്ചായത്ത് പ്രസിഡന്റ് രഞ്ജിത്ത് ജി മീനാഭവൻ, ബ്ലോക്ക് പഞ്ചായത്ത് മെമ്പർ റൂബി ജോയി, പഞ്ചായത്ത് മെമ്പർ സിജുമോൻ സി.എസ്. എന്നിവർ പ്രസംഗിക്കും.