പാലാ : 'ഞങ്ങടെ സ്‌കൂളും കിടുവായേ... അടുത്ത തിങ്കളാഴ്ച മുതൽ ഇനി ഞങ്ങളിവിടെയാ പഠിക്കുന്നത്'' ഇടനാട് ഗവ. എൽ.പി സ്‌കൂളിന്റെ പുതിയ മന്ദിരത്തിന്റെ പൂമുഖത്തുനിന്ന് തുള്ളിച്ചാടുകയാണ് നാലാം ക്ലാസ് വിദ്യാർത്ഥികളായ സിദ്ധാർത്ഥ് കൃഷ്ണയും, ശ്രീറാം വി. നായരും, അഥർവ്വും, ആനന്ദും, വൈഗ കൃഷ്ണയും, ശ്രീനന്ദയുമൊക്കെ. നവതി പിന്നിട്ട ഈ സരസ്വതി ക്ഷേത്രം പൊതുവിദ്യാഭ്യസ സംരക്ഷണയജ്ഞത്തിന്റെ ഭാഗമായി ഹൈടെക്കായിരിക്കുകയാണ്. 1930 ൽ കുടിപ്പള്ളിക്കൂടത്തിന്റെ പരിമിതികളിൽ തുടങ്ങി 1931 ൽ എൽ.പി സ്‌കൂളായി രൂപീകൃതമാകുകയും സ്വാതന്ത്ര്യത്തിന്റെ പിറ്റേവർഷം സർക്കാരിന് കൈമാറുകയും ചെയ്തതാണ് ഈ ഗ്രാമീണ വിദ്യാലയം. ആധുനിക സൗകര്യങ്ങളോടെ 1 കോടി 14 ലക്ഷം രൂപാ വിനിയോഗിച്ചാണ് സ്‌കൂളിന് പുതിയ മന്ദിരം പണിതുയർത്തിയിട്ടുള്ളത്. ഓഫീസ് മുറിയും 6 ക്ലാസ് മുറികളും ഉൾപ്പെടെ 8 മുറികളാണ് പുതിയ മന്ദിരത്തിലുള്ളത്. 5468 ചതുരശ്ര അടിയിലുള്ള പുതിയ മന്ദിരത്തിൽ സ്റ്റാഫ് റൂം, ഹാൾ, ശുചിമുറി സൗകര്യങ്ങൾ എന്നിവയും ഏർപ്പെടുത്തിയിട്ടുണ്ട്. ഹെഡ്മിസ്ട്രസ് എം.കെ. അജിതമോൾ, പി.ടി.എ പ്രസിഡന്റ് മായ സലിം എന്നിവരുടെ നേതൃത്വത്തിലുള്ള മികവാർന്ന പ്രവർത്തനം പഠനപാഠ്യേതര രംഗങ്ങളിൽ മികവിന്റെ കേന്ദ്രമായി ഈ വിദ്യാലയത്തെ മാറ്റിക്കഴിഞ്ഞു.

മന്ദിരം ഉദ്ഘാടനം 27 ന്
എൽ.പി സ്‌കൂളിന്റെ പുതിയ മന്ദിരത്തിന്റെ ഉദ്ഘാടനം 27 ന് രാവിലെ 10.30 ന് മന്ത്രി വി.ശിവൻകുട്ടി നിർവഹിക്കും. മാണി സി. കാപ്പൻ എം.എൽ.എ അദ്ധ്യക്ഷത വഹിക്കും. ജോസ് കെ. മാണി എം.പി മുഖ്യപ്രഭാഷണവും, തോമസ് ചാഴികാടൻ എം.പി സന്ദേശവും നൽകും. കോട്ടയം വിദ്യാഭ്യാസ ഉപഡയറക്ടർ സുബിൻ പോൾ വിദ്യാഭ്യാസ സംരക്ഷണ സന്ദേശം നൽകും.



''ഈ വർഷത്തെ രാമപുരം ഉപജില്ലാ സ്‌കൂൾ കലോത്സവത്തിൽ ഓവറാൾ ചാമ്പ്യൻഷിപ്പ് ഞങ്ങൾക്കാണ്. ശാസ്ത്രമേളയിലും കായികമേളയിലും മികവ് കാട്ടി. ഇതെല്ലാം കണക്കിലെടുത്ത് സർക്കാർ ഞങ്ങൾക്ക് നൽകിയ സമ്മാനമാണ് പുതിയ ബഹുനില സ്‌കൂൾ മന്ദിരം.

അജിതമോൾ എം.കെ, ഹെഡ്മിസ്ട്രസ്