കോട്ടയം: നഗരമദ്ധ്യത്തിലെ മാർക്കറ്റിൽ നഗരസഭാ ആരോഗ്യ വിഭാഗത്തിന്റെ നേതൃത്വത്തിൽ മിന്നൽ പരിശോധന. നഗരസഭാ ചെയർപേഴ്‌സൺ ബിൻസി സെബാസ്റ്റ്യന്റെയും , ആരോഗ്യ സ്റ്റാൻഡിംഗ് കമ്മറ്റി ചെയർമാൻ എബി കുന്നേൽപ്പറമ്പിലിന്റെയും നിർദ്ദേശപ്രകാരമാണ് നിരോധിത പ്ലാസ്റ്റിക്ക് ഉത്പന്നങ്ങൾ പിടിച്ചെടുക്കുന്നതിനായി പരിശോധന നടത്തിയത്. വിവിധ സ്ഥാപനങ്ങളിൽ നിന്നുമായി 190 കിലോഗ്രാം നിരോധിത പ്ലാസ്റ്റിക്ക് ഉത്പന്നങ്ങൾ പിടിച്ചെടുത്തു. റെയ്ഡിന് നഗരസഭാ ഹെൽത്ത് സൂപ്പർവൈസർ എം.ആർ സാനു നേതൃത്വം നൽകി. ഹെൽത്ത് ഇൻസ്പക്ടർമാരായ ടി.തങ്കം, എസ്.പ്രവീൺ, സി.സുനിൽ ,സനിൽകുമാർ എന്നിവരും പങ്കെടുത്തു. നിയമലംഘനം നടത്തിയ സ്ഥാപനങ്ങൾക്കെതിരെ പിഴ, പ്രോസിക്യൂഷൻ നടപടികൾ സ്വീകരിക്കുമെന്നും തുടർന്നുള്ള ദിവസങ്ങളിൽ പരിശോധന കർശനമാക്കുമെന്നും നഗരസഭാ സെക്രട്ടറി ഡി.ജയകുമാർ അറിയിച്ചു.