കോട്ടയം. അന്യസംസ്ഥാന തൊഴിലാളിയെ കൊലപ്പെടുത്താൻ ശ്രമിച്ച കേസിൽ സുഹൃത്ത് പിടിയിൽ. ആസാം സ്വദേശിയായ കൃഷ്ണഹിരയെയാണ് (28) പാലാ പൊലീസ് അറസ്റ്റ് ചെയ്തത്. ഇയാൾ തന്റെ സുഹൃത്തായ നിരഞ്ജൻ ബറുവാ എന്നയാളെയാണ് കൊലപ്പെടുത്താൻ ശ്രമിച്ചത്. ഇരുവരും ഉള്ളനാട് വലിയകാവുംപുറത്തുള്ള പ്ലൈവുഡ് കമ്പനിയിൽ ജോലി ചെയ്തു വരികയായിരുന്നു. കഴിഞ്ഞദിവസം രാത്രി കമ്പനിയുടെ ക്വാർട്ടേഴ്‌സിൽ വച്ച് ഇരുവരും തമ്മിൽ വാക്ക് തർക്കം ഉണ്ടാവുകയും, തുടർന്ന് കൃഷ്ണഹിര കത്തി കൊണ്ട് ഇയാളെ കുത്തുകയുമായിരുന്നു. പരിക്കേറ്റ ഇയാളെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പരാതിയെ തുടർന്ന് പ്രതിയെ പിടികൂടി കോടതിയിൽ ഹാജരാക്കി.