റോഡരുകിൽ പഴകിയ വാഹനങ്ങൾ ഉപേക്ഷിക്കുന്നവർ കുറവല്ല, എന്നാൽ മുംബയിലെ തെരുവിൽ ഉപേക്ഷിക്കപ്പെട്ട നിലയിൽ മാസങ്ങളായി കിടക്കുന്നത് ചില്ലറക്കാരനല്ല. കോടീശ്വരൻമാർ പോലും കൊതിക്കുന്ന ബെന്റ്ലി ഫ്‌ളൈയിംഗ് സ്പറാണ് പൊടിപിടിച്ച് കഴിഞ്ഞ ഏഴുമാസമായി തന്റെ ഉടമസ്ഥനെയും തേടി കാത്തുകിടക്കുന്നത്. ഈ സൂപ്പർ ലക്ഷ്വറി സെഡാന് നാല് കോടി രൂപയാണ് ഇന്ത്യയിലെ വില. മുംബയ് ബ്രീച്ച് കാൻഡി ഹോസ്പിറ്റലിനു സമീപത്തായാണ് കാർ പാർക്ക് ചെയ്തിരിക്കുന്നതെന്നാണ് ചില ഓൺലൈൻ മാദ്ധ്യമങ്ങൾ റിപ്പോർട്ട് ചെയ്യുന്നത്. കാറിന്റെ ചിത്രങ്ങളും പ്രചരിക്കുന്നുണ്ട്.

ബെന്റ്ലി പോലുള്ള സൂപ്പർ ലക്ഷ്വറി കാറുകൾ ഇന്ത്യയിൽ അപൂർവമായ കാഴ്ചയാണ്. പലപ്പോഴും അതിസമ്പന്നർ ഇവ വാങ്ങി എന്ന റിപ്പോർട്ടുകൾ വരാറുണ്ടെങ്കിലും, ഇതുമായി അവർ നിരത്തിൽ ഇറങ്ങുന്നതു തന്നെ അപൂർവ്വമാണ്. ഇന്ത്യയിലെ നിരത്തുകളുടെ അവസ്ഥയും, തിരക്കുമാവാം കാരണം. ഈ ആഡംബരക്കാറുകളെ പരിപാലിക്കുന്നതിനും വളരെ ചെലവുണ്ട്. സ്റ്റാറ്റസ് സിംബലായി കൊണ്ടുനടക്കാനാണ് അതിനാൽ ഉടമകൾ ഇഷ്ടപ്പെടുന്നത്.

മുംബയിൽ ഉപേക്ഷിക്കപ്പെട്ട നിലയിൽ കണ്ടെത്തിയ കാർ 2005 മുതൽ 2012 വരെ വിറ്റുപോയ ഫ്‌ളൈയിംഗ് സ്പറിന്റെ ഒന്നാം തലമുറയിൽപ്പെട്ട മോഡലാണ്. ഇപ്പോൾ വളരെ മോശപ്പെട്ട നിലയിലാണ് കാർ കാണപ്പെടുന്നത്. നാഗാലാൻഡിലാണ് കാർ രജിസ്റ്റർ ചെയ്തിരിക്കുന്നതെന്ന് നമ്പർ പ്ലേറ്റിൽ നിന്നും മനസിലാക്കാം.