കുവൈറ്റ് സിറ്റി : കുവൈറ്റിൽ നിന്ന് കോഴിക്കോട്ടേക്കുള്ള എയർ ഇന്ത്യ - എക്സ്പ്രസ് വിമാനം സാങ്കേതിക തകരാർ കാരണം അടിയന്തരമായി തിരിച്ചിറക്കി. IX394 ബോയിംഗ് 738 വിമാനമാണ് പറന്നുയർന്ന് ഒരുമണിക്കൂറിന് ശേഷം കുവൈറ്റ് വിമാനത്താവളത്തിൽ അടിയന്തരമായി ഇറക്കിയത്. സ്ത്രീകളും കുട്ടികളുമടക്കം നൂറിലധികം യാത്രക്കാരാണ് വിമാനത്തിൽ ഉണ്ടായിരുന്നത്.

ഉച്ചയ്ക്ക് 1.20നായിരുന്നു വിമാനം പുറപ്പെട്ടത്. സാങ്കേതിക തകരാറിനെ തുടർന്ന് 2.40ന് തിരികെ പറന്ന് കുവൈറ്റ് അന്താരാഷ്ട്ര വിമാനത്താവളത്തിൽ തിരിച്ചിറക്കുകയായിരുന്നു. യാത്ര മുടങ്ങിയതോടെ യാത്രക്കാർ പ്രതിഷേധിച്ചതിനെ തുടർന്ന് ഇവരെ മറ്റൊരു വിമാനത്തിൽ നാട്ടിലെത്തിക്കുമെന്ന് അധികൃതർ അറിയിച്ചു.