ന്യൂഡൽഹി: മുന്നാക്കക്കാരിലെ സാമ്പത്തികമായി പിന്നാക്കം നിൽക്കുന്നവർക്ക് സംവരണം ഏർപ്പെടുത്തുന്നതിന് എതിരായ ഹർജികളിൽ സുപ്രീംകോടതി തിങ്കളാഴ്‌ച വിധി പറയും. ചീഫ് ജസ്റ്റിസ് അദ്ധ്യക്ഷനായ അഞ്ചംഗ ഭരണഘടനാ ബെ‍ഞ്ചാണ് വിധി പറയുന്നത്. സാമ്പത്തിക സംവരണത്തിനായി ഭരണഘടനയുടെ 103ാം ഭേദഗതി ചോദ്യം ചെയ്തു കൊണ്ടുള്ള ഹർജികളിലാണ് സുപ്രീംകോടതി വിധി പറയുന്നത്.

മുന്നാക്കക്കാരിൽ സാമ്പത്തികമായി പിന്നാക്കം നിൽക്കുന്നവർക്ക് തൊഴിലിലും വിദ്യാഭ്യാസത്തിലും പത്തു ശതമാനം സംവരണമാണ് ഏർപ്പെടുത്തിയത്. ചീഫ് ജസ്റ്റിസ് യു.യു,​ ലളിത് അദ്ധ്യക്ഷനായ അഞ്ചംഗ ഭരണഘടനാ ബെഞ്ചാണ് സെപ്തംബർ 13 മുതൽ വാദം കേട്ടത്. ചീഫ് ജസ്റ്റിസിന് പുറമേ ജസ്റ്റിസുമാരായ ദിനേശ് മഹേശ്വരി,​ എസ്. രവീന്ദ്രഭട്ട്,​ ബേല എം. ത്രിവേദി,​ ജെബി പർദ്ദിവാല എന്നിവരാണ് ബെഞ്ചിലുള്ളത്. 2019ലാണ് കേന്ദ്രസർക്കാർ സാമ്പത്തിക സംവരണത്തിന് വേണ്ടി ഭരണഘടന ഭേദഗതി ചെയ്തത്.