ഭോപ്പാൽ: മദ്യപിക്കുന്നതിനും പുകവലിക്കുന്നതിനും പുകയില ഉപയോഗിക്കുന്നതിനും ഏതൊരാൾക്കും സ്വാതന്ത്ര്യമുണ്ടെന്നും എന്നാൽ വെള്ളത്തിന്റെ പ്രാധാന്യത്തെപ്പറ്റി ഇവർ അറിഞ്ഞിരിക്കേണ്ടതുണ്ടെന്നും ബി ജെ പി എം പി. മദ്ധ്യപ്രദേശിലെ രേവയിൽ നിന്നുള്ള ബി ജെ പി എം പിയായ ജനാർദ്ദൻ മിശ്രയാണ് വിവാദപരമായ പരാമർശം നടത്തിയത്. നവംബർ ആറിന് രേവയിലെ കൃഷ്ണരാജ് കപൂ‌ർ ഓഡിറ്റോറിയത്തിൽ നടന്ന ജലസംരക്ഷണ ശിൽപ്പശാലയിൽ സംസാരിക്കുകയായിരുന്നു അദ്ദേഹം.

'വെള്ളമില്ലാതെ ഭൂമി വരളുകയാണ്. ഇതിന് പരിഹാരം കാണേണ്ടത് വളരെ പ്രധാനമാണ്. നിങ്ങൾ ഗുഡ്‌ക്ക (പുകയില) കഴിക്കുകയോ, മദ്യപിക്കുകയോ, തിന്നർ, സുലേസൻ എന്നിവ മണപ്പിക്കുകയോ ചെയ്തോളൂ പക്ഷേ വെള്ളത്തിന്റെ പ്രാധാന്യം അറിഞ്ഞിരിക്കേണ്ടത് അനിവാര്യമാണ്'- എന്നായിരുന്നു മിശ്രയുടെ വാക്കുകൾ. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുകയാണ്.

ഏതെങ്കിലും സർക്കാ‌ർ ജലനികുതി ഒഴിവാക്കാമെന്ന് വാഗ്ദ്ധാനം ചെയ്യുകയാണെങ്കിൽ വെള്ളത്തിനുള്ള നികുതി തങ്ങൾ അടയ്ക്കാമെന്നും എന്നാൽ വൈദ്യുതി ഉൾപ്പടെയുള്ള മറ്റ് നികുതികൾ ഒഴിവാക്കണമെന്ന് മറുപടി നൽകണമെന്നും പ്രസംഗത്തിനിടെ മിശ്ര നിർദേശിച്ചു.

അടുത്തിടെ വെറുംകൈ കൊണ്ട് ടോയ്‌ലറ്റ് വൃ‌ത്തിയാക്കുന്ന മിശ്രയുടെ ദൃശ്യങ്ങൾ വാർത്തയായതും ഏറെ വിവാദങ്ങൾക്ക് ഇടയാക്കിയിരുന്നു. ഇതിന് പിന്നാലെയാണ് പുതിയ പരാമർശവുമായി എം പി രംഗത്തെത്തിയിരിക്കുന്നത്.

#WATCH | Rewa, Madhya Pradesh: "Lands are running dry of water, it must be saved... Drink alcohol, chew tobacco, smoke weed or smell thinner and solution but understand the importance of water," says BJP MP Janardan Mishra during a water conservation workshop pic.twitter.com/Nk878A9Jgc

— ANI (@ANI) November 7, 2022