ഇന്ന് പൂർണ്ണ ചന്ദ്രഗ്രഹണം. ഉച്ചയ്ക്ക് 2.39 മുതൽ രാത്രി 7.26വരെയാണ് ഗ്രഹണം. പൂർണ്ണഗ്രഹണം 3.46 മുതൽ 04.29 വരെയും. പകലായതിനാൽ ഗ്രഹണം പൂർണ്ണമായി കാണാനാകില്ലെങ്കിലും സൂര്യനസ്തമിക്കുന്ന ആറുമണിക്ക് തന്നെ ചന്ദ്രനും ഉദിച്ചുനിൽക്കുന്നതിനാൽ അവസാനദൃശ്യങ്ങൾ ഇന്ത്യയിൽ കാണാം. ലോകമെമ്പാടുമുള്ള ശാസ്ത്രജ്ഞർ അതീവ പ്രധാന്യത്തോടെയാണ് ചന്ദ്രഗ്രഹണത്തെ കാത്തിരിക്കുന്നത്.

ഭൂമി ചന്ദ്രന്റെ മുന്നിലൂടെ കടന്നുപോകുമ്പോൾ സൂര്യന്റെ കിരണങ്ങൾ ചന്ദ്രനിൽ എത്തുന്നത് തടയുമ്പോഴാണ് ചന്ദ്രഗ്രഹണം സംഭവിക്കുന്നത്. ശാസ്ത്രജ്ഞൻമാർ ശാസ്ത്രീയമായി ഈ പ്രതിഭാസത്തെ നോക്കികാണുമ്പോൾ ഇന്ത്യയിലെ ഹിന്ദുവിശ്വാസികൾ ഗ്രഹണസമയത്ത് പാലിക്കേണ്ട ആചാരങ്ങളെ കുറിച്ചും ബോധവാൻമാരാണ്. ആരാധനാലയങ്ങളിലെ ആരാധനാ സമയത്തിലടക്കം ഗ്രഹണസമയത്ത് മാറ്റങ്ങൾ വരുത്താറുണ്ട്.

അതുപോലെ തന്നെ ഗ്രഹണ സമയത്ത് ഭക്ഷണം കഴിക്കുന്നതിലും ചില ചിട്ടവട്ടങ്ങളുണ്ട്. ഗ്രഹണം സംഭവിക്കുന്ന സമയത്ത് ആഹാര സാധനങ്ങൾ കഴിക്കരുതെന്ന വിശ്വാസമുണ്ട്. ഗ്രഹണം തുടങ്ങുന്നതിനു മുമ്പ് ഭക്ഷണം കഴിക്കുന്നതാണ് നല്ലത്. ചിലയിടങ്ങളിൽ പാചകം ചെയ്ത ഭക്ഷണം സൂക്ഷിക്കുകയുമില്ല. ഗ്രഹണം സംഭവിക്കുമ്പോൾ ഭൂമിയിൽ വിഷസാന്നിദ്ധ്യം കൂടും എന്ന വിശ്വാസമാണ് ഇതിന് പിന്നിൽ. ഇത് മാത്രമല്ല ഗ്രഹണ ദിവസമുണ്ടാക്കുന്ന ആഹാരങ്ങളിൽ മഞ്ഞൾ, തുളസി എന്നിവ ചേർക്കാറുണ്ട്. വിഷവസ്തുക്കളെ തടയാൻ ഇവയ്ക്കാകുമെന്നതാണ് കാരണം. കുടിവെള്ളത്തിലാണ് പ്രധാനമായും തുളസി ഇലകൾ ചേർക്കുക. ഗ്രഹണ സമയത്ത് മുൻകൂട്ടി പാകം ചെയ്ത ഏതെങ്കിലും ഭക്ഷണം കഴിക്കുന്നത് ശരീരത്തിന് അസുഖമുണ്ടാക്കുമെന്നാണ് വിശ്വാസം.

ഇന്ത്യയിലെ ചന്ദ്രഗ്രഹണം

ഇന്ത്യയിൽ ഇന്ന് വൈകിട്ട് 3.46 മുതൽ 04.29 വരെയാണ് പൂർണ്ണഗ്രഹണം. അടുത്ത മൂന്ന് വർഷത്തിനിടയിലെ അവസാന പൂർണ ചന്ദ്രഗ്രഹണമായിരിക്കും ഇതെന്ന് നാസ അറിയിച്ചു. 2023 ഒക്ടോബർ 28 ന് ഇന്ത്യയിൽ അടുത്ത ഭാഗിക സമ്പൂർണ ചന്ദ്രഗ്രഹണവും 2025 സെപ്തംബർ 7ന് ഇന്ത്യയിലെ അടുത്ത സമ്പൂർണ്ണചന്ദ്രഗ്രഹണവുമുണ്ടാകും. പൗർണ്ണമി ദിവസം ഭൂമി ഇടയിലും സൂര്യൻ,ചന്ദ്രൻ എന്നിവ ഇരുവശങ്ങളിലുമായി ഏകദേശം നേർരേഖയിലാവുമ്പോൾ ചന്ദ്രനിൽ പതിക്കേണ്ട സൂര്യപ്രകാശത്തെ ഭൂമി തടയുകയും ചന്ദ്രൻ ഭൂമിയുടെ നിഴലിലാവുകയും ചെയ്യുന്നതാണ് ചന്ദ്രഗ്രഹണം. ഈ സമയത്ത് ചന്ദ്രൻ അപ്രത്യക്ഷമാകുന്നതിനു പകരം കടുംചുവപ്പ് നിറത്തിലാകും. രക്തചന്ദ്രൻ അഥവാ ബ്ലഡ് മൂൺ എന്നാണ് ഇതറിയപ്പെടുന്നത്. ചന്ദ്രന്റെ കുറച്ച് ഭാഗം മാത്രമാണ് ഭൂമിയുടെ പ്രഛായയിലൂടെ കടന്നു പോകുന്നതെങ്കിൽ ഭാഗീകചന്ദ്രഗ്രഹണമെന്നും നിഴൽഭാഗത്തിനു പുറത്ത് മങ്ങിയ നിഴൽ പ്രദേശമായി ചന്ദ്രനെ കാണുന്നതിനെ ഉപഛായഗ്രഹണമെന്നും പറയും.

ഇവിടെ ദൃശ്യമാകും

രാജ്യത്ത് എല്ലായിടത്തും ചുവന്ന നിറത്തിലുള്ള പൂർണ്ണ ചന്ദ്രൻ ദൃശ്യമാകില്ലെങ്കിലും കിഴക്കൻമേഖലകളിൽ വൈകിട്ട് 5.12ന് പൂർണ്ണചന്ദ്രഗ്രഹണത്തിന്റെ അവസാന ഘട്ടത്തിൽ രക്തചന്ദ്രൻ പ്രകടമാകും. അഗർത്തല (ത്രിപുര), ഐസ്വാൾ (മിസോറം), ഭഗൽപൂർ (ബിഹാർ), ഭുവനേശ്വർ, കട്ടക്ക് (ഒഡീഷ), കൊഹിമ (നാഗാലാൻഡ്), കൊൽക്കത്ത, ഡാർജിലിംഗ് (പശ്ചിമ ബംഗാൾ)എന്നിവിടങ്ങളിൽ കാണാം.

കേരളത്തിൽ ഭാഗികം

കേരളത്തിൽ ഇന്ന് ചന്ദ്രനുദിക്കുന്നത് വൈകിട്ട് 6 മണിക്കായതിനാൽ പൂർണ്ണചന്ദ്രഗ്രഹണം ദൃശ്യമാകില്ലെങ്കിലും അല്പനേരം ഭാഗീകചന്ദ്രഗ്രഹണം കാണാം. സന്ധ്യക്ക്, മറയില്ലാതെ ചക്രവാളം കാണുന്ന സ്ഥലത്താണെങ്കിൽ 15 മിനുറ്റ് കാണാം. രാത്രി 7.26വരെ ഉപഛായഗ്രഹണം തുടരുമെങ്കിലും തിരിച്ചറിയാൻ പ്രയാസമാണ്.