ന്യൂഡൽഹി: വിപണിമൂല്യത്തിൽ ഒരുലക്ഷം കോടി ഡോളറിന്റെ (82 ലക്ഷം കോടി രൂപ)​ ഇടിവ് രേഖപ്പെടുത്തുന്ന ആദ്യ പബ്ളിക് ലിസ്‌റ്റഡ് കമ്പനിയെന്ന മോശം പട്ടം ചൂടി പ്രമുഖ അമേരിക്കൻ ഇ-കൊമേഴ്‌സ് ഭീമന്മാരായ ആമസോൺ. അടിസ്ഥാന പലിശനിരക്ക് വർദ്ധന,​ മോശം പ്രവർത്തനഫലം എന്നിവയെത്തുടർന്ന് നിക്ഷേപകർ വൻതോതിൽ ഓഹരികൾ വിറ്റഴിച്ചതാണ് ആമസോണിന് തിരിച്ചടിയായത്.

കഴിഞ്ഞ ബുധനാഴ്‌ച ഓഹരിവില 4.3 ശതമാനം ഇടിഞ്ഞ് 87,​900 കോടി ഡോളറിലാണ് (72.07 ലക്ഷം കോടി രൂപ)​ ആമസോണിന്റെ വിപണിമൂല്യമുള്ളത്. 2021 ജൂലായിൽ വിപണിമൂല്യം 1.88 ലക്ഷം കോടി ഡോളറായിരുന്നു (154.16 ലക്ഷം കോടി രൂപ)​. ആമസോൺ സ്ഥാപകൻ ജെഫ് ബെസോസിന്റെ ആസ്‌തി ഈവർഷം ഇതിനകം 8,​300 കോടി ഡോളർ (6.80 ലക്ഷം കോടി രൂപ)​ ഇടിഞ്ഞ് 10,​900 കോടി ഡോളറുമായിട്ടുണ്ട് (8.93 ലക്ഷം കോടി രൂപ)​.