തിരുവനന്തപുരം: നഗ്നവിഡീയോ പകർത്തിയ ശേഷം ദൃശ്യങ്ങൾ പ്രചരിപ്പിക്കുമെന്ന് ഭീഷണിപ്പെടുത്തി യുവതിയെ പീഡിപ്പിച്ച കേസിൽ പൊലീസുകാരൻ അറസ്റ്റിൽ. വിജിലൻസ് ഗ്രേഡ് എസ്.സി.പി.ഒയും അരുവിക്കര കാച്ചാണി സ്വദേശിയുമായ സാബു പണിക്കരെ (48) ആണ് അരുവിക്കര പൊലീസ് അറസ്റ്റു ചെയ്തത്. 40കാരിയുടെ പരാതിയിലാണ് ഇയാൾ അറസ്റ്റിലായത്.

ഭർത്താവ് ഉപേക്ഷിച്ച യുവതിയുടെ വീഡിയോ ആണ് ഇയാൾ പകർത്തിയത്. അതിന് ശേഷം ഇത് പ്രചരിപ്പിക്കുമെന്ന് ഭീഷണിപ്പെടുത്തിയായിരുന്നു പീഡനം. വിവാഹിതനും ഒരു കുട്ടിയുടെ പിതാവുമാണ് പ്രതി സാബു. കഴിഞ്ഞ ഏഴുവർഷമായി യുവതിയെ ഭീഷണിപ്പെടുത്തി നിരന്തരം പീഡിപ്പിച്ചു വരികയായിരുന്നു.

യുവതിയെ തിരുവനന്തപുരം, എറണാകുളം, തൃശൂർ എന്നിവിടങ്ങളിൽ കൊണ്ടുപോയി ഹോട്ടലുകളിൽ മുറി എടുത്ത് പലപ്പോഴും പീഡിപ്പിച്ചിരുന്നുവെന്നും പൊലീസ് പറഞ്ഞു. അടുത്തിടെ യുവതിയുടെ നഗ്ന വീഡിയോ പുറത്തുവിട്ടതോടെയാണ് യുവതി അരുവിക്കര പൊലീസിൽ പരാതി നൽകിയത്. വീഡിയോ പ്രചരിപ്പിച്ച രണ്ടുപേരെ കഴിഞ്ഞ ദിവസം അറസ്റ്റുചെയ്തിരുന്നു.