കൊച്ചി: കുഫോസ് വിസി ഡോ. കെ റിജി ജോണിന്റെ നിയമനം ഹൈക്കോടതി ഡിവിഷൻ ബെഞ്ച് റദ്ദാക്കി. വിസിയെ നിയമിച്ചത് യുജിസി ചട്ടപ്രകാരമല്ലെന്ന ഹർജി ഹൈക്കോടതി അംഗീകരിച്ചു. ചീഫ് ജസ്റ്റിസ് ഉൾപ്പെട്ട ഡിവിഷൻ ബെഞ്ചാണ് ഹർജി പരിഗണിച്ചത്.

കെ റിജി ജോണിന് മതിയായ യോഗ്യതയില്ലെന്ന് ആരോപിച്ച് വിസി നിയമന പട്ടികയിൽ ഉണ്ടായിരുന്ന എറണാകുളം സ്വദേശി ഡോ. കെ കെ വിജയനാണ് ഹൈക്കോടതിയെ സമീപിച്ചത്. യു ജി സി മാനദണ്ഡങ്ങൾ അനുസരിച്ച് ഒരു സർവകലാശാലയിൽ പ്രൊഫസറായി പത്തു വർഷത്തെ പ്രവൃത്തി പരിചയം വേണം. എന്നാൽ റിജി ജോണിന് ഇതില്ല എന്നായിരുന്നു ഹർജിക്കാരന്റെ വാദം.

യു ജി സി മാനദണ്ഡം കുഫോസ് വിസി നിയമനത്തിന് ബാധകമല്ലെന്നായിരുന്നു സർക്കാരിന്റെ വാദം. തമിഴ്നാട്ടിലെ ഫിഷറീസ് സർവകലാശാലയിൽ നിന്ന് കുഫോസിലേക്ക് ഡീൻ ആയി എത്തിയ വ്യക്തിയാണ് റിജി ജോൺ. പി എച്ച് ഡി കാലയളവായ മൂന്നു വർഷം പ്രവൃത്തി പരിചയത്തിലുൾപ്പെടുത്തിയാണ് അദ്ദേഹം അപേക്ഷ നൽകിയത്. അതേസമയം, വിധിയുടെ വിശദാംശങ്ങൾ അറിഞ്ഞ ശേഷം പ്രതികരിക്കാമെന്ന് റിജി ജോൺ പറഞ്ഞു.