ന്യൂഡൽഹി: കുഫോസ് മുൻ വൈസ് ചാൻസലർ ഡോ. കെ റിജി ജോൺ സുപ്രീം കോടതിയെ സമീപിച്ചു. വി സി നിയമനം റദ്ദാക്കിയ ഹൈക്കോടതി ഉത്തരവിനെതിരെയാണ് സുപ്രീം കോടതിയിൽ അപ്പീൾ നൽകിയത്. കാർഷിക വിദ്യാഭ്യാസം സംസ്ഥാന ലിസ്റ്റിലുള്ളതാണെന്നും യു ജി സി ചട്ടം ബാധകമല്ലെന്നുമാണ് അപ്പീലിൽ പറയുന്നത്.

നവംബർ പതിനാലിനാണ് ഡോ. കെ റിജി ജോണിന്റെ നിയമനം ഹൈക്കോടതി ഡിവിഷൻ ബെഞ്ച് റദ്ദാക്കിയത്. വിസിയെ നിയമിച്ചത് യുജിസി ചട്ടപ്രകാരമല്ലെന്ന ഹർജിക്കാരന്റെ വാദം ഹൈക്കോടതി അംഗീകരിക്കുകയായിരുന്നു. ചീഫ് ജസ്റ്റിസ് ഉൾപ്പെട്ട ഡിവിഷൻ ബെഞ്ചായിരുന്നു വിധി പറഞ്ഞത്.

കെ റിജി ജോണിന് മതിയായ യോഗ്യതയില്ലെന്ന് ആരോപിച്ച് വി സി നിയമന പട്ടികയിൽ ഉണ്ടായിരുന്ന എറണാകുളം സ്വദേശി ഡോ. കെ കെ വിജയനായിരുന്നു ഹൈക്കോടതിയെ സമീപിച്ചത്. യു ജി സി മാനദണ്ഡങ്ങൾ അനുസരിച്ച് ഒരു സർവകലാശാലയിൽ പ്രൊഫസറായി പത്തു വർഷത്തെ പ്രവൃത്തി പരിചയം വേണം. എന്നാൽ റിജി ജോണിന് ഇതില്ല എന്നായിരുന്നു ഹർജിക്കാരന്റെ വാദം.