തിരുവനന്തപുരം: സർക്കാരിന്റെ നിലപാടിൽ പ്രതിഷേധിച്ച് റേഷൻ കടകൾ സംസ്ഥാന വ്യാപകമായി അടച്ചിടാനൊരുങ്ങി വ്യാപാര സംഘടനകൾ. സർക്കാർ റേഷൻ കമ്മീഷൻ പൂർണമായി നൽകാത്തതിൽ പ്രതിഷേധിച്ച് ശനിയാഴ്ച മുതൽ കടകൾ അനിശ്ചിതമായി അടച്ചിടാനാണ് തീരുമാനം. ഇടത് അനുകൂല സംഘടനകളും സമരത്തിന്റെ ഭാഗമാകും.

കഴിഞ്ഞ മാസത്തിലെ റേഷൻ കമ്മീഷൻ തുകയുടെ 49 ശതമാനം മാത്രമേ നൽകാൻ സാധിക്കു എന്ന സർക്കാർ നിലപാടാണ് സമരത്തിലേയ്ക്കെത്തിയത്. റേഷൻ കുടിശിക സംബന്ധിച്ച് സർ‌ക്കാർ പുറത്തിറക്കിയ ഉത്തരവിൽ കുടിശ്ശിക എന്ന് നൽകി തീർക്കുമെന്ന് വ്യക്തമായി രേഖപ്പെടുത്തിയിരുന്നില്ല. തുടർന്നാണ് ഇടത് അനുകൂല സംഘടനകളടക്കം യോഗം ചേർന്ന് സമരാഹ്വാനം നടത്തിയത്. സമരത്തെക്കുറിച്ചുള്ള നോട്ടീസ് നാളെ സർക്കാരിന് കൈമാറാനാണ് വ്യാപാര സംഘടനകളുടെ തീരുമാനം.