പൂവാർ: കരുംകുളം ഗ്രാമ പഞ്ചായത്തിലെ പുതിയതുറ കുളപ്പാറ ഹൗസിൽ ഉണ്ണി സജിത ദമ്പതികളുടെ ഏക മകൻ ഫാബിയോ തിരയിൽപ്പെട്ട് മരിച്ചു. പുതിയതുറ ഫിഷ് ലാൻഡിംഗ് സെന്ററിന് സമീപം കളിച്ചു കൊണ്ടിരുന്ന കുട്ടി ശക്തിയോടെ ഉയർന്ന് പൊങ്ങിയ തിരയിൽപ്പെടുകയായിരുന്നു. ഞായറാഴ്ചയായിരുന്നു സംഭവം. ഓടിക്കൂടിയവർ കുട്ടിയെ വീണ്ടെടുത്ത് കാഞ്ഞിരംകുളത്തെ സ്വകാര്യ ആശുപത്രിയിൽ പ്രാഥമിക ചികിത്സ നൽകിയ ശേഷം നെയ്യാറ്റിൻകരയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം തിരുവനന്തപുരം മെഡിക്കൽ കോളേജിലെ പോസ്റ്റ് മോർട്ടത്തിനുശേഷം പുതിയതുറയിൽ സംസ്‌കരിച്ചു. പൂവാർ കോസ്റ്റൽ പൊലീസ് കേസെടുത്തു.