കൊച്ചി: വീട്ടുമുറ്റത്ത് കളിച്ചുകൊണ്ടിരുന്ന രണ്ടുവയസുകാരനെ അയൽവാസിയുടെ പൂവൻകോഴി ആക്രമിച്ച് പരിക്കേൽപ്പിച്ചതായി പരാതി. കുഞ്ഞിന്റെ മുഖത്തും തലയിലും പരിക്കേറ്റു. കരച്ചിൽ കേട്ട് ഓടിയെത്തിയ മാതാവാണ് കുഞ്ഞിനെ രക്ഷിച്ചത്. കുട്ടി ചികിത്സയിലാണ്.

ഇക്കഴിഞ്ഞ പതിനെട്ടിന് രാവിലെയാണ് സംഭവമുണ്ടായത്. മഞ്ഞുമ്മൽ മുട്ടാർകടവ് റോഡിൽ കോൽപറമ്പിൽ കെ എ ഹുസൈൻകുട്ടിയുടെ വീട്ടിലാണ് കോഴി അക്രമം കാട്ടിയത്. അയൽവാസി കടവിൽ ജലീലിന്റേതാണ് കോഴി. ഹുസൈൻകുട്ടിയുടെ മകളുടെ കുട്ടിയാണ് ആക്രമണത്തിന് ഇരയായത്. സംഭവത്തെത്തുടർന്ന് ജലീലിനെതിരെ ഹുസൈൻകുട്ടി പൊലീസിൽ പരാതി നൽകി. ചികിത്സകൾക്കായി കുട്ടി അഞ്ചുദിവസം ആശുപത്രിയിൽ കഴിഞ്ഞെന്നും അതിനാൽ ആശുപത്രിചെലവും നഷ്ടപരിഹാരവും വേണമെന്നുമാണ് പരാതിയിൽ ആവശ്യപ്പെട്ടിരിക്കുന്നത്. ഇതേ കോഴി നേരത്തേയും ആക്രമണം നടത്തിയിട്ടുണ്ടെന്നും ഇക്കാര്യം ഉടമയെ അറിയിച്ചിട്ടും വേണ്ട നടപടി സ്വീകരിച്ചില്ലെന്നും പരാതിയിൽ പറയുന്നുണ്ട്. കോഴിയെ ഉടൻ കസ്റ്റഡിയിലെടുക്കാനുള്ള തീരുമാനത്തിലാണ് പൊലീസ് എന്നാണ് റിപ്പോർട്ട്.