ന്യൂഡൽഹി: പ്രശസ്ത സിനിമ-ടെലിവിഷൻ-തീയേറ്റർ താരം വിക്രം ഗോഖലെ (77) അന്തരിച്ചു. ആരോഗ്യപ്രശ്‌നങ്ങളെ തുടർന്ന് പുണെയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം. വെന്റിലേറ്ററിൽ തുടരുന്ന ഗോഖലെയുടെ ആരോഗ്യനില വഷളായിരുന്നു. നവംബർ 5നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. മറാഠി നാടകങ്ങളിലൂടെ അഭിനയലോകത്തെത്തിയ വിക്രം ഹിന്ദി, മറാഠി സിനിമകളിലൂടെയും ടെലിവിഷൻ പരമ്പരകളിലൂടെയുമാണ് നിരവധി ആരാധകരെ നേടിയത്. അഗ്നീപഥ്, ഭൂൽ ഭുലയ്യ, ഹം ദിൽ ദേ ചുകെ സനം, മിഷൻ മംഗൾ എന്നിവയാണ് ശ്രദ്ധേയ ചിത്രങ്ങൾ. നൂറോളം ചിത്രങ്ങളിലും അഭിനയിച്ചിട്ടുണ്ട്. അനുമതി എന്ന മറാഠി ചിത്രത്തിലൂടെ മികച്ച നടനുള്ള ദേശീയ പുരസ്‌കാരവും അദ്ദേഹം കരസ്ഥമാക്കിയിരുന്നു. മറാഠി ചിത്രമായ ഗോദാവരിയാണ് റിലീസായ ഏറ്റവും പുതിയ ചിത്രം. പുനൈയിലെ ബാൽ ഗന്ധർവ ഓഡിറ്റോറിയത്തിൽ ഭൗതികശരീരം പൊതുദർശനത്തിന് വെയ്ക്കും. ശനിയാഴ്ച വൈകുന്നേരം വൈകുണ്ഡ് ശ്മശാനത്തിൽ അന്തിമസംസ്‌കാരച്ചടങ്ങുകൾ നടക്കുമെന്നും കുടുംബം അറിയിച്ചു.