കോട്ടക്കൽ: 'ജീവിതമാണ് ലഹരി' എന്ന സർക്കാർ പദ്ധതിയുടെ ഭാഗമായി കോട്ടൂർ എ.കെ.എം സ്‌പോർട്സ് അക്കാഡമിയുടെ നേതൃത്വത്തിൽ 'എ.കെ.എം വേൾഡ് കപ്പ് ' സംഘടിപ്പിച്ചു. ഖത്തറിലല്ല കോട്ടൂരിൽ എന്ന പേരിൽ സംഘടിപ്പിച്ച പരിപാടി മന്ത്രി വി. അബ്ദുറഹ്മാൻ ഉദ്ഘാടനം ചെയ്തു. നഗരസഭാ ചെയർപേഴ്സൺ ബുഷ്റ ഷബീർ അദ്ധ്യക്ഷത വഹിച്ചു. സൂപ്പർ സ്റ്റുഡിയോ മാനേജർ അഷ്‌റഫ് ബാവ മുഖ്യാതിഥിയായി. സ്‌കൂൾ മാനേജ കറുത്തേടത്ത് ഇബ്രാഹീം ഹാജി ഉപഹാര സമർപ്പണം നടത്തി. നഗരസഭാ കൗൺസിലറും എസ്.എം.സി ചെയർമാനുമായ എം.സി മുഹമ്മദ് ഹനീഫ പദ്ധതി വിശദീകരിച്ചു.
32 രാജ്യങ്ങളുടെ ജേഴ്സി അണിഞ്ഞ് 352 കുട്ടികളാണ് ഫുട്‌ബാൾ മത്സരത്തിൽ പങ്കാളികളാകുന്നത്. ചെണ്ടമേളം, കോൽക്കളി, പൂരക്കളി, വട്ടപ്പാട്ട്, ദഫ് മുട്ട്, തിരുവാതിര തുടങ്ങി വിവിധ കലാരൂപങ്ങളവതരിപ്പിച്ചാണ് വിദ്യാർത്ഥികൾ മന്ത്രിയെ വരവേറ്റത്. വിദ്യാർത്ഥികളുടെ വിവിധ കായിക പ്രകടനങ്ങളും അരങ്ങേറി.
നഗരസഭ കൗൺസിലർമാരായ ടി. കബീർ, കെ. സഫീർ അസ്‌ലം, പി.ടി.എ വൈസ് പ്രസിഡന്റ് കെ. സുധീഷ് കുമാർ, എസ്.എം.സി വൈസ് ചെയർമാൻ സമീറുദ്ധീൻ ഇരണിയൻ, പ്രധാന അദ്ധ്യാപകൻ ബഷീർ കുരുണിയൻ, പ്രിൻസിപ്പൽ അലി കട വണ്ടി, സ്റ്റാഫ് സെക്രട്ടറി എം.ടി ജുമൈല എന്നിവർ സംസാരിച്ചു.