പാലക്കാട്: ഉടുമുണ്ട് ഊരി സ്ത്രീകളുടെ മുഖം മറച്ച് പീഡിപ്പിക്കുന്നയാൾ അറസ്റ്റിൽ. പാലക്കാട് സൗത്ത് പൊലീസാണ് കൊടുമ്പ് സ്വദേശിയായ വിഷ്ണുവിനെ പിടികൂടിയത്. സ്ഫടികം സിനിമ സ്റ്റൈൽ പിന്തുടർന്ന് കുറ്റകൃത്യം ചെയ്യുന്ന ഇയാൾ 'സ്ഫടികം വിഷ്ണു' എന്നാണ് അറിയപ്പെടുന്നത്.

കഴിഞ്ഞ ദിവസം കൊടുമ്പ് സ്വദേശിയായ യുവതിക്കെതിരെ ഇയാൾ ഉടുമുണ്ട് ഊരി അതിക്രമം നടത്തിയിരുന്നു. ഇതിൽ പരാതി ലഭിച്ച പൊലീസ് വ്യക്തമായ സൂചന ലഭിച്ചതിനെ തുടർന്നാണ് വിഷ്ണുവിനെ കസ്റ്റഡിയിൽ എടുത്തത്. വിഷ്ണുവിന്റെ അറസ്റ്റോടെ കൊടുമ്പിനും സമീപ പ്രദേശത്തും സമാനമായ ആക്രമണം നേരിട്ട പലരും പരാതിയുമായി എത്തുന്നുണ്ട്. പാലക്കാട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ജോലി കഴിഞ്ഞ വൈകുന്നേരങ്ങളിൽ ഒറ്റയ്ക്ക് വീടുകളിലേക്ക് മടങ്ങുന്ന സ്ത്രീകളെയാണ് ഇയാൾ ലക്ഷ്യം വയ്ക്കുന്നത് എന്നാണ് പൊലീസ് പറയുന്നത്. ഇവരെ നിരീക്ഷിച്ച് ആളൊഴിഞ്ഞ സ്ഥലത്ത് വച്ച് ആക്രമിക്കാൻ പദ്ധതിയിടും. ആളൊഴിഞ്ഞ സ്ഥലത്ത് വച്ച് സ്വന്തം ഉടമുണ്ട് അഴിച്ചെടുത്ത് സ്ത്രീകളുടെ പിന്നാലെയെത്തി മുണ്ട് മുഖത്തിടും. ആളെ മനസിലാക്കാതിരിക്കാനാണ് ഇത്. തുടർന്ന് ഇവരെ വലിച്ചിഴച്ച് കുറ്റിക്കാട്ടിൽ എത്തിച്ച് പീഡിപ്പിക്കുന്നതാണ് ഇയാളുടെ രീതി. മാനഹാനി ഭയന്ന് ഇത്തരത്തിൽ ആക്രമണം നേരിട്ട പലരും പുറത്തുപറയുന്നില്ലെന്നാണ് വിവരം.