തിരുവല്ല : ലഹരിക്കടിമയായി എക്‌സൈസ് ഓഫീസിൽ കടന്നു കയറി ഉദ്യോഗസ്ഥരെ കൈയേറ്റം ചെയ്യാൻ ശ്രമിച്ച കേസിൽ ഒളിവിലായിരുന്ന യുവാവ് പിടിയിലായി. കവിയൂർ മത്തിമല വേഴുകാലായിൽ വീട്ടിൽ ജ്യോതിഷ് (32) ആണ് പിടിയിലായത്. കഴിഞ്ഞമാസം 14ന് മഞ്ഞാടി എക്‌സൈസ് റേഞ്ച് ഓഫീസിലായിരുന്നു കേസിന് ആസ്പദമായ സംഭവം. മുൻ വൈരാഗ്യത്തിന്റെ പേരിൽ ജ്യോതിഷും സുഹൃത്ത് അനൂപും ചേർന്ന് എക്‌സൈസ് ഓഫീസിൽ കടന്നുകയറി ഉദ്യോഗസ്ഥരെ കൈയറ്റം ചെയ്യാൻ ശ്രമിക്കുകയായിരുന്നു. സംഭവശേഷം ഒളിവിൽപോയ ജ്യോതിഷ് വീട്ടിലെത്തിയിട്ടുണ്ടെന്ന് ലഭിച്ച രഹസ്യവിവരത്തെ തുടർന്ന് തിരുവല്ല സി.ഐ.പി.എസ്. വിനോദിന്റെ നേതൃത്വത്തിലുള്ള സംഘം വീടുവളഞ്ഞ് പ്രതിയെ പിടികൂടുകയായിരുന്നു. എക്‌സൈസ് ഉദ്യോഗസ്ഥർ തടഞ്ഞുവച്ച് പൊലീസിന് കൈമാറിയ അനൂപ് റിമാൻഡിലാണ്. കോടതിയിൽ ഹാജരാക്കിയ പ്രതിയെ ഇന്നലെ റിമാൻഡ് ചെയ്തു.