തിരുവല്ല: നഗരത്തിലെ ബൈപ്പാസിൽ മഴുവങ്ങാട് ചിറ പാലത്തിൽ പാഴ്സൽ ലോറിയും ബൈക്കും കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം. മുണ്ടക്കയം വണ്ടൻപതാൽ പുഞ്ചയിൽ വീട്ടിൽ ടി.ജെ. തോമസിന്റെ മകൻ പ്രിജിൽ (18) ആണ് മരിച്ചത്. ഇന്നലെ ഉച്ചയ്ക്ക് 12നാണ് അപകടം. തിരുവല്ല ഭാഗത്തുനിന്ന് ചെങ്ങന്നൂർ ഭാഗത്തേക്ക് പോവുകയായിരുന്ന പ്രിജിൽ ഓടിച്ചിരുന്ന ബൈക്ക് മറ്റൊരു വാഹനത്തെ മറികടക്കുന്നതിനിടെ എതിർദിശയിൽ നിന്നുവന്ന ലോറിയുമായി കൂട്ടിയിടിക്കുകയായിരുന്നു. ലോറിയിൽ ഇടിച്ച് നിയന്ത്രണം നഷ്ടപ്പെട്ട ബൈക്ക് ലോറിക്ക് പിന്നാലെ വന്ന ഓട്ടോറിക്ഷയിലും ഇടിച്ചശേഷം വലതുഭാഗത്തേക്ക് തെറിച്ചു വീഴുകയായിരുന്നു. അപകടത്തിൽ തലയ്ക്ക് ഗുരുതര പരിക്കേറ്റ പ്രിജിലിനെ തിരുവല്ലയിലെ സ്വകാര്യ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ലോറി ഡ്രൈവറെ തിരുവല്ല പൊലീസ് കസ്റ്റഡിയിലെടുത്തു.