പത്തനംതിട്ട : കുട്ടികൾ ഇന്നത്തെ പ്രതീക്ഷയും നാളത്തെ സ്വപ്നസാക്ഷാത്കാരവുമാണെന്ന് ജില്ലാ കളക്ടർ ഡോ.ദിവ്യ എസ് അയ്യർ പറഞ്ഞു. ജില്ലാതല ശിശുദിനാഘോഷത്തോട് അനുബന്ധിച്ച് ജില്ലാശിശു ക്ഷേമ സമിതിയുടെ നേതൃത്വത്തിൽ പത്തനംതിട്ട തൈക്കാവ് ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിൽ സംഘടിപ്പിച്ച പൊതുസമ്മേളനത്തിൽ സന്ദേശം നൽകുകയായിരുന്നു കളക്ടർ. കുട്ടികൾക്ക് എല്ലാവെല്ലുവിളികളേയും ധൈര്യപൂർവം നേരിടുന്നതിനും കൈവരിക്കാൻ പോകുന്ന ഒാരോ നേട്ടങ്ങളേയും ആത്മവിശ്വാസത്തോടെയും സമചിത്തതയോടെയും സമീപിക്കുന്നതിനുമുള്ള സാഹചര്യം ഒരുക്കികൊടുക്കുക എന്നത് ഒരോ പൗരന്റെയും കടമയാണെന്ന് ജില്ലാ കളക്ടർ ഒാർമിപ്പിച്ചു. ചൂരക്കോട് ഗവ. എൽ.പി.എസിലെ കുട്ടികൾ അവതരിപ്പിച്ച ലഹരിമുക്ത സമൂഹം എന്ന ക്യാമ്പയിൻ ജില്ലാ കളക്ടർ ഉദ്ഘാടനം ചെയ്തു.
കുട്ടികളുടെ പ്രധാനമന്ത്രി പഴകുളം ഗവൺമെന്റ് എൽ.പി.എസിലെ വിദ്യാർത്ഥിനി നെഹ്‌സീന കെ.നദീർ സമ്മേളനം ഉദ്ഘാടനം ചെയ്തു. കുട്ടികളുടെ സ്പീക്കർ കൊടുമൺ സെന്റ് പീറ്റേഴ്‌സ് യു.പി.എസിലെ വിദ്യാർത്ഥിനിയായ അൽക്കാ മേരി ബിജു അദ്ധ്യക്ഷതവഹിച്ചു. സംസ്ഥാന ശിശുക്ഷേമ സമിതി അംഗം പ്രൊഫ.ടി.കെ.ജി നായർ ശിശുദിന സ്റ്റാമ്പ് പ്രകാശനം ചെയ്തു. കലഞ്ഞൂർ ഗവൺമെന്റ് എച്ച്.എസ്.എസ് വിദ്യാർത്ഥി വി.നിരഞ്ജൻ, ചെന്നീർക്കര എസ്.എൻ.ഡി.പി എച്ച്.എസ്.എസ് വിദ്യാർത്ഥിനി എൽ.ജിതാ ലക്ഷ്മി, ചൂരക്കോട് എൻ.എസ്.എസ് എച്ച്.എസ്.എസ് വിദ്യാർത്ഥി സോജു സി ജോസ്, ജില്ലാ ശിശുക്ഷേമ സമിതി വൈസ് പ്രസിഡന്റ് പ്രൊഫ.കെ.മോഹനകുമാർ, സെക്രട്ടറി ജി.പൊന്നമ്മ, ജോയിന്റ് സെക്രട്ടറി എം.എസ്.ജോൺ, ട്രഷറർ ആർ.ഭാസ്‌കരൻ നായർ, എക്‌സിക്യൂട്ടീവ് അംഗം കെ.ജയകൃഷ്ണൻ, അംഗങ്ങളായ കലാനിലയം രാമചന്ദ്രൻ നായർ, രാജൻ പടിയറ, പി.ജി.രാജൻ ബാബു, കുഞ്ഞന്നാമ്മ കുഞ്ഞ്, ചന്ദ്രികാ മുകുന്ദൻ, വിവേക്, ഡോ.രാജഗോപാലൻ, രാജേശ്വരൻ തുടങ്ങിയവർ പങ്കെടുത്തു.
കളക്ടറേറ്റ് അങ്കണത്തിൽ ജില്ലാതല ശിശുദിനാഘോഷത്തിന് തുടക്കമിട്ട് ജില്ലാ പൊലീസ് മേധാവി സ്വപ്നിൽ മധുകർ മഹാജൻ പതാക ഉയർത്തി. പത്തനംതിട്ട നഗരസഭാചെയർമാൻ അഡ്വ.ടി.സക്കീർ ഹുസൈൻ ശിശുദിനഘോഷയാത്ര ഫ്‌ളാഗ് ഒാഫ് ചെയ്തു.