ചെങ്ങന്നൂർ: ചെങ്ങന്നൂർ ഐ.എച്ച്.ആർ.ഡി എൻജിനീയറിംഗ് കോളേജിൽ ജില്ലാ കളക്ടറുടെ നേതൃത്വത്തിൽ നടത്തിയ ചെങ്ങന്നൂർ താലൂക്ക് തല പൊതുജന പരാതി പരിഹാര അദാലത്തിൽ ലഭിച്ച മുഴുവൻ പരാതികളും തീർപ്പാക്കി. 147 പരാതികളാണ് അദാലത്തിൽ ലഭിച്ചത്. അതത് വകുപ്പ് മേധാവികളുടെ സാന്നിദ്ധ്യത്തിൽ ജില്ലാ കളക്ടർ നേരിട്ടാണ് പരാതികൾ പരിഗണിച്ചത്. കൂടുതൽ പരിശോധനകൾ ആവശ്യമുള്ളവ തുടർ നടപടികൾ സ്വീകരിക്കുന്നതിനായി ബന്ധപ്പെട്ട വകുപ്പ് മേധാവികൾക്ക് കൈമാറി. വിവിധ സർക്കാർ ഓഫിസുകളുമായി ബന്ധപ്പെട്ട 91 പരാതികളാണ് ലഭിച്ചത്. നേരത്തെ ലഭിച്ച 56 പരാതികളും ഉൾപ്പെടെയാണ് 147 പരാതികൾ പരിഗണിച്ചത്. അദാലത്ത് സജി ചെറിയാൻ എം.എൽ.എ. ഉദ്ഘാടനം ചെയ്തു. എ.ഡി.എം.എസ്.സന്തോഷ് കുമാർ, ഡെപ്യൂട്ടി കളക്ടർമാരായ ബി.കവിത, ജെ.മോബി, ആർ.സുധീഷ്, ആർ.ഡി.ഒ.എസ്.സുമ, പുഞ്ച സ്‌പെഷ്യൽ ഓഫീസർ ജെസിക്കുട്ടി മാത്യൂ, ചെങ്ങന്നൂർ തഹസിൽദാർ എം.ബിജുകുമാർ, എൽ.ആർ.തഹസീൽദാർ ഷീബ മാത്യു, സീനിയർ സൂപ്രണ്ട് ജെ. ശ്രീകല, വാർഡ് കൗൺസിലർ വിജി ശ്രീകാന്ത്, വിവിധ താലൂക്ക്് തല വകുപ്പ് മേധാവികൾ, ഉദ്യോഗസ്ഥർ തുടങ്ങിയവർ പങ്കെടുത്തു.