കോന്നി: നിയോജക മണ്ഡലത്തിലെ റീബിൽഡ് കേരളയുടെ പ്രവർത്തന പുരോഗതി കെ.യു ജനീഷ് കുമാർ എം.എൽ.എയുടെ നേതൃത്വത്തിൽ യോഗം ചേർന്നു വിലയിരുത്തി. നാല് റോഡുകളുടെ നിർമ്മാണമാണ് നിയോജകമണ്ഡലത്തിൽ നടക്കുന്നത് പ്രവർത്തികൾ സമയബന്ധിതമായി പൂർത്തീകരിക്കുന്നതിന് പ്രവർത്തന കലണ്ടർ തയാറാക്കിയിട്ടുണ്ട്. തണ്ണിത്തോട് പഞ്ചായത്തിൽ 4.32 കിലോമീറ്റർ ദൂരമുള്ള തണ്ണിത്തോട് പ്ലാന്റേഷൻ തേക്കുതോട് റോഡ് 5.05 കോടി രൂപയ്ക്കാണ് ആധുനിക നിലവാരത്തിൽ ഡി.ബി.എം- ബി.സി ടാറിംഗിൽ വികസിപ്പിക്കുന്നത്. പ്രവർത്തിയുടെ ആദ്യഘട്ട ടാറിംഗ് പൂർണമായും പൂർത്തിയായിട്ടുണ്ട്. അഞ്ചര മീറ്റർ വീതിയിലാണ് ടാറിംഗ് നടത്തിയിട്ടുള്ളത്. റോഡിന്റെ സംരക്ഷണഭിത്തിയും റോഡിന്റെ വീതി വർദ്ധിപ്പിക്കലും വെള്ളം ഒഴുകിപ്പോകാനുള്ള ചപ്പാത്തുകളുടെ നിർമ്മാണവും പൂർത്തിയായിട്ടുണ്ട്. സീതത്തോട് പഞ്ചായത്തിലെ കോട്ടമൺപാറ മേലെ കോട്ടമൺപാറ പാണ്ഡ്യൻ പാറ റോഡ് 1.79 കിലോമീറ്റർ ദൂരത്തിൽ 2.48 കോടി രൂപയ്ക്കാണ് ആധുനിക നിലവാരത്തിൽ നിർമ്മിക്കുന്നത്. പ്രവർത്തിയിൽ ഒരു കിലോമീറ്റർ റോഡ് കോൺക്രീറ്റും, 4 കലുങ്കുകളുടെ നിർമ്മാണവും റോഡിന്റെ വീതി വർദ്ധിപ്പിക്കലും പൂർത്തിയാക്കിയിട്ടുണ്ട്. അരുവാപ്പുലം പഞ്ചായത്തിലെ പഞ്ചായത്ത് പടി പുളിഞ്ചാണി രാധപ്പടി റോഡ് 3.06 കിലോമീറ്റർ ദൂരത്തിൽ 4.04 കോടി രൂപയ്ക്കാണ് ആധുനിക നിലവാരത്തിൽ വികസിപ്പിക്കുന്നത്. കോന്നി പഞ്ചായത്തിൽ കോന്നി പൊലീസ് സ്റ്റേഷൻ -ടിവിഎം ആശുപത്രി- ഇളങ്ങ വട്ടം ക്ഷേത്രം റോഡ് 2.89 കിലോമീറ്റർ ദൂരത്തിൽ 2.57 കോടി രൂപയ്ക്കാണ് ആധുനിക നിലവാരത്തിൽ വികസിപ്പിക്കുന്നത്. പ്രവർത്തിയുടെ കോന്നി മാർക്കറ്റിന് സമീപമുള്ള കലുങ്കിന്റെ നിർമ്മാണ പ്രവർത്തി പൂർത്തീകരിച്ചിട്ടുണ്ട്. കലുങ്കിന്റെ വലുപ്പം കാരണം ഓടയിൽ കൂടി ഒഴുകിയെത്തുന്ന വെള്ളം കലുങ്കിനുള്ളിൽ കെട്ടിക്കിടക്കുന്നത് പരാതിക്ക് ഇടയാക്കിയിരുന്നു. അരുവാപ്പുലം പഞ്ചായത്ത്‌ പ്രസിഡന്റ് രേഷ്മ മറിയം റോയ്, തണ്ണിത്തോട് പഞ്ചായത്ത് പ്രസിഡന്റ് കുട്ടപ്പൻ, ബ്ലോക്ക് പഞ്ചായത്ത് അംഗങ്ങളായ തുളസി മണിയമ്മ, വർഗീസ് ബേബി, പഞ്ചായത്ത് അംഗങ്ങളായ ഉദയകുമാർ, ജോജു വർഗീസ്, വി.കെ രഘു, റീ ബിൽഡ് കേരള ഇനിഷ്യേറ്റീവ് കോട്ടയം എക്സിക്യൂട്ടീവ് എഞ്ചിനീയർ പി.പ്രസാദ്, ആർ.കെ.ഐ പത്തനംതിട്ട അസിസ്റ്റന്റ് എൻജിനീയർ റഫിൻ, വിവിധ റോഡുകളുടെ കരാർ കമ്പനി ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.