കൊല്ലം: വീടിന് മുമ്പിൽ വന്ന് അസഭ്യം പറഞ്ഞത്‌ ചോദ്യം ചെയ്തതിന്റെ വിരോധത്തിൽ യുവാവിനെ സംഘം ചേർന്ന് കമ്പി വടികൊണ്ട് ആക്രമിച്ച് പരിക്കേൽപ്പിച്ച പ്രതികൾ പിടിയിൽ. തിരുനൽവേലി അമ്പാസമുദ്രം, നോർത്ത് സ്ട്രീറ്റിൽ മഹേഷ്(36), നെടുമ്പന വിപിൻ ഭവനിൽ വിപിൻ(28) എന്നിവരാണ് കൊട്ടിയം പൊലീസിന്റെ പിടിയിലായത്. കഴിഞ്ഞ ദിവസം പ്രതികൾ വീടിന് മുന്നിൽ വന്ന് അസഭ്യം പറഞ്ഞത്‌ തഴുത്തല സ്വദേശിയായ പ്രദീപ് ചോദ്യം ചെയ്തിരുന്നു. ഇതിന്റെ വിരോധത്തിൽ പ്രതികൾ രാത്രിയോടെ സംഘം ചേർന്ന് പ്രദീപിന്റെ തഴുത്തല പി.കെ ജംഗ്ഷനിലുള്ള കോഴിക്കടയിലെത്തി മർദ്ദിക്കുകയായിരുന്നു. കടയുടെ മുൻവശത്തിരുന്ന മോട്ടോർ സൈക്കിൾ തല്ലിത്തകർക്കുകയും കടയിൽ സൂക്ഷിച്ചിരുന്ന 17000 രൂപ അപഹരിക്കുകയും ചെയ്തുവെന്ന പരാതിയുടെ അടിസ്ഥാനത്തിലാണ് കൊട്ടിയം പൊലീസ് പ്രതികളെ അറസ്റ്റ് ചെയ്തത്. ഇൻസ്‌പെക്ടർ എം.സി ജിംസ്റ്റയുടെ നേതൃത്വത്തിൽ എസ്.ഐ റെനോക്‌സ്,​ സി.പി.ഒ പ്രശാന്ത് എന്നിവരടങ്ങിയ സംഘമാണ് പ്രതികളെ പിടികൂടിയത്.