കൊല്ലം: ബൈപ്പാസിൽ നിയന്ത്രണം വിട്ട കാർ ടാങ്കറിലും പാഴ്‌സൽ ലോറിയിലുമിടിച്ച് രണ്ടുപേർക്ക് പരിക്ക്. അപകടത്തിൽ പാഴ്‌സൽ ലോറി മറിഞ്ഞു. ലോറി മറിയുന്നത് കണ്ട് ബ്രേക്കിട്ട സ്‌കൂട്ടർ മറിഞ്ഞെങ്കിലും യാത്രക്കാർ രക്ഷപ്പെട്ടു. പരിക്കേറ്റ ലോറി ഡ്രൈവർ, ആലപ്പുഴ സി.വി വാർഡ് പുതുവൽ പുരയിടത്തിൽ ഷെമീർ (32), കാർ ഓടിച്ചിരുന്ന നിലമേൽ സ്വദേശി രാധാകൃഷണൻ നായർ (60) എന്നിവരെ പാലത്തറയിലെ സഹകരണ ആശുപത്രിയിൽ പ്രവേശിപ്പിച്ചു.
ഇന്നലെ ഉച്ചയ്ക്ക് 12.30 ഓടെ ബൈപ്പാസിൽ പാലത്തറയ്ക്കും എസ്.എൻ പബ്ലിക് സ്‌കൂൾ ജംഗ്‌ഷനും മദ്ധ്യേയായിരുന്നു അപകടം. ആലപ്പുഴയിൽ നിന്ന് കൊട്ടിയം ഭാഗത്തേക്ക് പാഴ്‌സലുമായി വരികയായിരുന്ന ആലപ്പി പാഴ്‌സൽ സർവീസിന്റെ ലോറിയാണ് മറിഞ്ഞത്. പാഴ്‌സൽ ലോറിയുടെ മുന്നിൽ തിരുവനന്തപുരം ഭാഗത്തേക്ക് പോവുകയായിരുന്ന ടാങ്കറിൽ എതിർദിശയിൽ വന്ന കാർ ഇടിച്ചതിനെ തുടർന്ന് പാഴ്‌സൽ ലോറിയിൽ ഇടിക്കുകയായിരുന്നു. ഹൈവേ പൊലീസ്, അഗ്നിശമന സേന എന്നിവരെത്തി രക്ഷാപ്രവർത്തനം നടത്തി.