തൃശൂർ: 'ചിരി' ഹെൽപ്പ് ലൈൻ നമ്പറിലേക്ക് വിളിച്ച മൂന്നിലൊന്ന് പേരുടെയും പ്രശ്‌നം കുട്ടികളുടെ മാനസിക പിരിമുറുക്കം. കുട്ടികളുടെ മാനസിക സംഘർഷം ലഘൂകരിക്കാനായി പൊലീസ് നടപ്പാക്കിയ ചിരിയിലേക്ക് ഒക്ടോബർ വരെ 36,380 കോളുകളാണ് ലഭിച്ചത്. ഇതിൽ 12,111 എണ്ണം കുട്ടികളുടെ പ്രശ്‌നങ്ങളുമായി ബന്ധപ്പെട്ട കോളായിരുന്നു.
ഇതിൽ മാനസിക പിരിമുറുക്കം പങ്കുവെച്ചത് 4086 പേർ. 24,269 കോൾ മറ്റ് വിവരങ്ങൾ തേടിയുള്ളവയായിരുന്നു. മാനസിക സമ്മർദ്ദം അനുഭവിക്കുന്ന കുട്ടികളെ സഹായിക്കാനായി സംസ്ഥാനത്ത് മാനസിക സാമൂഹിക വിദഗ്ദ്ധരുടെ സേവന ശൃംഖലയ്ക്ക് രൂപം കൊടുത്തിരിക്കുകയാണ് പൊലീസ്. യോഗ്യതയുള്ളവരും പരിശീലനം ലഭിച്ചതുമായ മാനസികാരോഗ്യ പ്രൊഫഷണലുകളുടെ കൂട്ടായ്മയിൽ സൈക്കോളജിസ്റ്റുകൾ, കൗൺസിലർമാർ, സൈക്യാട്രിസ്റ്റുകൾ, മുതിർന്ന ഉപദേശകർ (എസ്.പി.സി ടീച്ചർമാർ), എസ്.പി.സി സീനിയർ കേഡറ്റുകൾ, പാസ്ഡ് ഔട്ട് കേഡറ്റുകൾ എന്നിവർ പങ്കാളികളാകും.
രക്ഷിതാക്കളിൽ നിന്നും അദ്ധ്യാപകരിൽ നിന്നും വിദ്യാർത്ഥികളിൽ നിന്നും പൊതുജനങ്ങളിൽ നിന്നും പങ്കാളിത്തം കൂടിയതായി പൊലീസ് പറഞ്ഞു. പ്രത്യേക പരിശീലനം ലഭിച്ച വനിതാ പൊലീസ് ഉദ്യോഗസ്ഥരാണ് കോളുകളോട് പ്രതികരിക്കുന്നത്. ആവശ്യമായ പിന്തുണയും, പ്രശ്‌നാധിഷ്ഠിതമായി അടിയന്തര സഹായം ലഭ്യമാക്കുകയും ചെയ്യും. ഗൗരവമേറിയതാണെങ്കിൽ, വിശദാംശങ്ങൾ മാനസികാരോഗ്യ വിദഗ്ദ്ധർക്ക് കൈമാറും.
നേരിടുന്ന പ്രശ്‌നങ്ങൾ ഇവ
മൊബൈൽ ഫോൺ അഡിക്ഷൻ 1370 വിളികൾ
ഗെയിം അഡിക്ഷൻ 1556
പഠന സംബന്ധമായ പ്രശ്‌നങ്ങൾ 1031
കുടുംബ പ്രശ്‌നങ്ങൾ 1945
പഠനോപകരണങ്ങളുടെ അഭാവം 859
സഹായം തേടാം
മാനസിക സാമൂഹിക പ്രശ്‌നം, അല്ലെങ്കിൽ മറ്റ് തരത്തിലുള്ള വിഷമതകൾ അനുഭവിക്കുന്ന കുട്ടികൾക്കും അവരുടെ മാതാപിതാക്കൾക്കും ഹെൽപ്പ് ലൈനിൽ വിളിച്ച് കുട്ടികൾ നേരിടുന്ന പ്രശ്‌നങ്ങൾ അറിയിച്ച് പരിഹാരം തേടാം. 24 മണിക്കൂറും പ്രവർത്തനനിരതമാണ്. നമ്പർ: 9497 900 200.
ശ്രദ്ധിക്കാൻ
24 മണിക്കൂറിനകം കുട്ടിക്ക് മാനസികാരോഗ്യ വിദഗ്ദ്ധന്റെ സേവനം ലഭ്യമായിട്ടുണ്ടോ ഇല്ലയോ എന്ന് ചിരി ഹെൽപ്‌ലൈനിൽ നിന്നും രക്ഷിതാക്കളെ വിളിച്ച് ഉറപ്പുവരുത്തും. കുട്ടികളുടെ പ്രശ്‌നങ്ങൾക്ക് പരിഹാരം ഉറപ്പാക്കാൻ ചിൽഡ്രൻ ആൻഡ് പൊലീസ് ഹൗസിൽ ക്ലിനിക്കൽ സൈക്കോളജിസ്റ്റിന്റെ സേവനം ലഭ്യമാണ്. രക്ഷിതാക്കൾക്കും കുട്ടികൾക്കും ഫോൺ കോളിലൂടെയോ നേരിട്ടോ സേവനത്തിനായി സമീപിക്കാം. ഓരോ കുട്ടികളുടെയും വിഷയങ്ങളിൽ തുടർനടപടികളിലൂടെ ലഭ്യമാക്കിയ സേവനങ്ങളുടെ അനന്തര ഘട്ടങ്ങളും ഫലപ്രാപ്തിയും വിലയിരുത്തും.
കൂട്ടായ്മയിലുള്ളത്
37 സൈക്കോളജിസ്റ്റുകൾ
42 കൗൺസിലർമാർ
21 സൈക്യാട്രിസ്റ്റുകൾ
56 മുതിർന്ന ഉപദേശകർ (എസ്.പി.സി ടീച്ചർമാർ)
290 എസ്.പി.സി സീനിയർ കേഡറ്റുകൾ/പാസ്ഡ് ഔട്ട് കേഡറ്റുകൾ.