കുടിവെള്ള പദ്ധതി മന്ത്രി ഡോ. ബിന്ദു നാടിന് സമർപ്പിച്ചു
64 കുടുംബങ്ങൾക്ക് കുടിവെള്ള കണക്ഷൻ

ഇരിങ്ങാലക്കുട: നിയോജക മണ്ഡലത്തിൽ ആളൂർ പഞ്ചായത്തിലെ കാട്ടാംതോട് കോളനി പ്രദേശത്തെ കുടിവെള്ളക്ഷാമത്തിനു ശാശ്വത പരിഹാരമാകും. കാട്ടാംതോട് എസ്.സി കുടിവെള്ള പദ്ധതി ഉന്നത വിദ്യാഭ്യാസ സാമൂഹ്യനീതി മന്ത്രി ഡോ. ആർ. ബിന്ദു നാടിന് സമർപ്പിച്ചു.

ജനകീയാസൂത്രണം പദ്ധതിയിൽ ഉൾപ്പെടുത്തി പട്ടികജാതി വികസന ഫണ്ട് 32.74 ലക്ഷം വിനിയോഗിച്ചാണ് കുടിവെള്ള പദ്ധതി നിർമ്മിച്ചിരിക്കുന്നത്. ജൽജീവൻ മിഷനും കുടിവെള്ള പദ്ധതികളും ഉപയോഗപ്പെടുത്തി ഇരിങ്ങാലക്കുട മണ്ഡലത്തിലെ കുടിവെള്ള മേഖലയിൽ സ്വയംപര്യാപ്തത കൈവരിക്കാനുളള നടപടികൾ പുരോഗമിക്കുകയാണെന്ന് മന്ത്രി പറഞ്ഞു. കാട്ടാംതോട് കോളനിയിലെ അടിസ്ഥാന സൗകര്യങ്ങൾ വികസിപ്പിക്കാനും സ്ത്രീകളുടെ തൊഴിൽപരമായ പ്രശ്‌നങ്ങൾ പരിഹരിക്കാനും നടപടി സ്വീകരിക്കുമെന്നും മന്ത്രി വ്യക്തമാക്കി.

ആളൂർ പഞ്ചായത്ത് പ്രസിഡന്റ് കെ.ആർ. ജോജോ അദ്ധ്യക്ഷനായി. മാള ബ്ലോക്ക് പഞ്ചായത്ത് പ്രസിഡന്റ് സന്ധ്യ നൈസൻ, മുൻ പഞ്ചായത്ത് പ്രസിഡന്റ് റോയ് ജെ. കളത്തിങ്കൽ, പഞ്ചായത്ത് വൈസ് പ്രസിഡന്റ് രതി സുരേഷ്, ജല അതോറിറ്റി എക്‌സിക്യൂട്ടീവ് എൻജിനിയർ വിജു മോഹൻ, പഞ്ചായത്ത് മെമ്പർമാർ, ഉദ്യോഗസ്ഥർ തുടങ്ങിയവർ പങ്കെടുത്തു.