കൊടുങ്ങല്ലൂർ: താലൂക്ക് ആശുപത്രിയുടെ തെക്കുവശത്തുള്ള ബവാസ് റോഡിൽ വൺവേ നടപ്പിലാക്കുവാനും ഈ റോഡിൽ വാഹനങ്ങളുടെ അനധികൃത പാർക്കിംഗ് നിരോധിക്കുവാനും ട്രാഫിക് റെഗുലേറ്ററി കമ്മിറ്റി തീരുമാനിച്ചു. റെഗുലേറ്ററി തീരുമാനം ഇന്നുമുതൽ പ്രാബല്യത്തിൽ വരും. താലൂക്ക് ആശുപത്രിയുടെ കാഷ്വാലിറ്റി തെക്കുഭാഗത്ത് പുതുതായി നിർമ്മിച്ച കെട്ടിടത്തിലേക്ക് മാറ്റിയതിനാൽ ഈ റോഡിൽ തിരക്ക് വർദ്ധിച്ചു.

ഈ റോഡിന്റെ ഭാഗത്ത് ഓട്ടോറിക്ഷയും മറുവശം കാറുകളും മറ്റും പാർക്ക് ചെയ്യുന്നതിനാൽ ആംബുലൻസ് ഉൾപ്പെടെയുള്ള വാഹനങ്ങൾക്ക് ആശുപത്രിയിലേക്ക് പ്രവേശിക്കുവാൻ പ്രയാസമാണ്. ഈ സാഹചര്യത്തിലാണ് ക്ഷേത്രത്തിന് വടക്കുഭാഗത്തുള്ള റോഡിൽ പടിഞ്ഞാറ് നിന്നും കിഴക്കോട്ട് മാത്രമേ വാഹനഗതാഗതം അനുവദിക്കാൻ കഴിയുള്ളൂവെന്ന് ട്രാഫിക്ക് റെഗുലേറ്ററി വിലയിരുത്തി.

സിവിൽ സ്റ്റേഷന്റെ പിറകിലുള്ള എസ്.ബി.ഐ റോഡിലും ചന്തപ്പുര ബസ് സ്റ്റാൻഡിന് സമീപത്തുള്ള ദളവാക്കുളം റോഡിലും വാഹനങ്ങളുടെ അനധികൃത പാർക്കിംഗ് നിരോധിച്ചിട്ടുണ്ട്. റോഡ് പണി നടക്കുന്നതിനാൽ തൃശൂരിൽ നിന്ന് കൊടുങ്ങല്ലൂരിലേക്കുള്ള ബസുകൾ എസ്.എൻ പുരം വഴി വന്ന് കൊടുങ്ങല്ലൂർ ബസ് സ്റ്റാൻഡിൽ ട്രിപ്പ് അവസാനിപ്പിക്കുന്നത് യാത്രക്കാർക്ക് ബുദ്ധിമുട്ട് അനുഭവപ്പെടുന്നതിനാൽ വടക്കേ നടയിലേക്ക് വന്ന് ക്ഷേത്രം ചുറ്റി വൺവേ റോഡ് വഴി ബസ് സ്റ്റാൻഡിൽ എത്തേണ്ടതാണ്.

ട്രാഫിക് റെഗുലേറ്ററി കമ്മിറ്റി യോഗത്തിൽ നഗരസഭ ചെയർപേഴ്‌സൺ എം.യു. ഷിനിജ അദ്ധ്യക്ഷയായി. വൈസ് ചെയർമാൻ കെ.ആർ. ജൈത്രൻ, പൊലീസ് റവന്യൂ ആർ.ടി.ഒ പൊതുമരാമത്ത് വകുപ്പ് മുൻസിപ്പൽ ഉദ്യോഗസ്ഥന്മാരും പങ്കെടുത്തു.