അരിമ്പൂർ: സർക്കാരിന്റെ അതിദരിദ്രരില്ലാത്ത കേരളം പദ്ധതിക്ക് അരിമ്പൂർ പഞ്ചായത്തിൽ തുടക്കം. അതിദരിദ്രരായി കണ്ടെത്തിയ 29 കുടുംബങ്ങൾക്കുള്ള അവകാശരേഖകളുടെ വിതരണവും സൗജന്യ മെഡിക്കൽ ക്യാമ്പിന്റെ ഉദ്ഘാടനവും പഞ്ചായത്ത് പ്രസിഡന്റ് സ്മിത അജയകുമാർ നിർവഹിച്ചു. പോഷകാഹാര കിറ്റ്, വീട് അറ്റകുറ്റപ്പണി, നിർമ്മാണം, റേഷൻ കാർഡ്, ആധാർ കാർഡ് അടക്കമുള്ള രേഖകൾ ലഭ്യമാക്കൽ, സൗജന്യ ചികിത്സയും പെൻഷനുകളും ആനുകൂല്യങ്ങളും ലഭ്യമാക്കൽ തുടങ്ങി 10 സഹായ പദ്ധതികളാണ് പദ്ധതിയിലുളളത്. അതിദരിദ്രർക്കുളള അവശ്യമരുന്നുകൾ പ്രൈമറി ഹെൽത്ത് സെന്റർ, ഹോമിയോ, ആയുർവേദ ഡിസ്‌പെൻസറികൾ വഴി സൗജന്യമായി ലഭ്യമാക്കും. ലൈഫ് പദ്ധതിയിൽ ഉൾപ്പെട്ട കുടുംബങ്ങൾക്ക് മുൻഗണനാ പട്ടികയിൽ ഉൾപ്പെടുത്തി വീട് നൽകുന്നതിന് 10 ലക്ഷം വകയിരുത്തിയിട്ടുണ്ട്. ഈ കുടുംബങ്ങളിൽ ആവശ്യമുള്ളവർക്ക് മുച്ചക്രവാഹനം നൽകാനും തുക വകയിരുത്തും. ചടങ്ങിൽ പഞ്ചായത്ത് വൈസ് പ്രസിഡന്റ് ഷിമി ഗോപി അദ്ധ്യക്ഷത വഹിച്ചു. മെഡിക്കൽ ക്യാമ്പിന് ഡോ. ദീപ, ഡോ. ലിജ, ഡോ. ദീപക് തുടങ്ങിയവർ നേതൃത്വം നൽകി.