വടക്കാഞ്ചേരി: കാലത്തിനു വഴികാട്ടിയായി ചരിത്രത്തോടൊപ്പം നടന്ന പി. ചിത്രൻ നമ്പൂതിരിപ്പാടിന് ഈ വർഷത്തെ വി.കെ. നാരായണ ഭട്ടതിരി സ്മൃതി പുരസ്‌കാരം. വേദ പണ്ഡിതനും വടക്കാഞ്ചേരി ഗ്രന്ഥശാല സ്ഥാപകരിൽ പ്രമുഖനുമായിരുന്ന വി.കെ. നാരായണ ഭട്ടതിരി സ്മരണയ്ക്കായി വ്യത്യസ്ത മേഖലകളിലെ പണ്ഡിതശ്രേഷ്ഠർക്ക് വടക്കാഞ്ചേരി ശ്രീകേരളവർമ്മ പബ്ലിക് ലൈബ്രറിയും കോഴിക്കോട് വി.കെ. നാരായണ ഭട്ടതിരി സ്മാരക ട്രസ്റ്റും നൽകിവരുന്ന ഭട്ടതിരി സ്മൃതി പുരസ്‌കാരം 10000 രൂപയുടെ പുസ്തകങ്ങളും പ്രശസ്തി പത്രവുമടങ്ങുന്നതാണ്. ഡിസംബർ 10നു വൈകുന്നേരം വടക്കാഞ്ചേരി പബ്ലിക് ലൈബ്രറി ഹാളിൽ മന്ത്രി കെ. രാധാകൃഷ്ണൻ പുരസ്‌കാരം സമ്മാനിക്കുമെന്ന് വി.കെ. നാരായണ ഭട്ടതിരി ട്രസ്റ്റ് ചെയർമാൻ പി. ചന്ദ്രശേഖരൻ, ലൈബ്രറി പ്രസിഡന്റ് വി. മുരളി, സെക്രട്ടറി ജി. സത്യൻ എന്നിവർ അറിയിച്ചു.