ഗുരുവായൂർ : ഏകാദശിയോട് അനുബന്ധിച്ച് ദേവസ്വം നടത്തുന്ന ഗജരാജൻ ഗുരുവായൂർ കേശവൻ അനുസ്മരണം വെള്ളിയാഴ്ച നടക്കും. ഗജരാജൻ കേശവന്റെ ഛായാചിത്രം വഹിച്ചുള്ള ദേവസ്വത്തിലെ ഗജവീരന്മാരുടെ ഘോഷയാത്ര രാവിലെ ഏഴിന് തുടങ്ങും. ഗുരുവായൂർ തിരുവെങ്കിടാചലപതി ക്ഷേത്രത്തിൽ നിന്ന് ആരംഭിച്ച് ശ്രീപാർത്ഥസാരഥി ക്ഷേത്രം വഴി ഗുരുവായൂർ ക്ഷേത്രസന്നിധിയിലെത്തി ചേർന്ന് ക്ഷേത്രവും ക്ഷേത്രക്കുളവും പ്രദക്ഷിണം ചെയ്ത് ശ്രീവത്സം അതിഥി മന്ദിരത്തിന് മുമ്പിലുള്ള കേശവന്റെ പ്രതിമയ്ക്ക് മുന്നിലെത്തി പുഷ്പചക്രം സമർപ്പിക്കും.

ഗജഘോഷയാത്രയിൽ ദേവസ്വത്തിന്റെ പതിനഞ്ചാനകൾ പങ്കെടുക്കും. ഗോപാലകൃഷ്ണൻ, ഗോപീകൃഷ്ണൻ, ഗോപീകണ്ണൻ, ഗോകുൽ, കണ്ണൻ, ബൽറാം, ചെന്താമരാക്ഷൻ, ദാമോദർദാസ് , ഗജേന്ദ്ര, ഇന്ദ്രസെൻ, കൃഷ്ണ, പീതാംബരൻ, രാധാകൃഷ്ണൻ, രാജശേഖരൻ, രവി കൃഷ്ണൻ, ശ്രീധരൻ, വിഷ്ണു, ദേവീ എന്നീ ആനകളിൽ നിന്നാണ് 15 ആനകളെ തെരഞ്ഞെടുക്കുക. ഗജഘോഷയാത്രയിൽ അണിനിരക്കുന്ന ആനകൾക്ക് പുന്നത്തൂർ ആനക്കോട്ടയിൽ അന്നേ ദിവസം ഉച്ചതിരിഞ്ഞ് മൂന്നിന് സമൃദ്ധമായ ആനയൂട്ടും നടത്തും.